MPCC chuan thuchhuah siamin, “September ni 15, 2023 a ZPM Champhai North Block Conference neihnaah ZPM Leader Pu Lalduhoma chuan Mizoram Sorkar leiba chungchang a sawinaah sorkar leiba tam tak inchhekkhawl mek chu tun sorkar lai mek leiba chauh ni loin, sorkar hmasa aṭanga inchhekkhawl chho zel a nih thu a sawi hi Congress Party chuan a ngai thu tak hle.
“Document ṭha leh rintlak hai chhuah zung zung tur a awm tawh laia, hetianga thudik chanve hmanga mipui bum ala tum fan hi kalphung thar an aupuiah beisei tur a awm chuang lova, eng nge an kalphung thar chu tih hi Congress Party ngaihdan a ni.
“MNF Sorkar a piangin Mizoram Sorkar leiba a pung nasa tih hi thudik a ni. Pu Lalduhoma sawi angin kan leiba te hi GSDP aṭanga teh tur a ni bawk. MNF Sorkar term hmasa lamah khan Mizoram Sorkar leiba chu kum 2004 ah GSDP aṭanga tehin 102% a ni a. 2005 ah 108.9% a ni. Kum 2006 ah 106.2%, 2007 ah 101.9% leh 2008 ah 103.5% leiba a nei a ni.
“Kum 2008 aṭanga Congress a sorkar aṭang khan kan leiba nasa takin a kiam a. Kum 2018 Congress term tawpah Mizoram Sorkar leiba chu 32% ah tla thlain MNF Sorkar leibat sa, GSDP aṭanga teha 71.5% lai Congress Sorkar khan a rul a. Hei mai ni lovin June ni 30, 2016 a RBI a Ways & Means hmanga a sum puk kha Congress sorkarin Ways & Means hmanga a sum puk hnuhnun ber a ni nghe nghe.
“Assembly House ah ngei pawh Pu Lalduhoma hian Mizoram leibat chungchang sawiin 2018-2019 a Congress a tlak kum khan fiscal deficit hi vaibelchhe 352.93 kan nei a. Chu chu 1.58% a ni. Vawiinah hian khatihlaia Finance Minister Pu Lalsawta khan a ti ṭha a ni tih ka sawi duh a, ka ṭan a ni lo, thudik ka sawi a ni. 3% chin kha min phal sak a. 1.58% ah fiscal hi a ti hniam thei a. A fakawm a ni. Tunah MNF alo sorkar veleh a, kum khat a han sorkar a, 1.58% aṭang khan kum khat chhung lekin vaibelchhe 2215 fiscal deficit nei hmanin 8.34% a chho hman a ni, tiin a sawi a.
“He a thusawi hi Assembly Proceeding ah hai chhuah theihin a awm vek a ni. A awmna hmun a zira a thusawi danglam ṭhin Pu Lalduhoma hian Assembly House a Pu Lalsawta sum enkawl thiam zia a sawi hnu a, political platform aṭanga leiba chungchanga congress hmer tel a tum leh ta mai hi congress party chuan pawi a ti a. Thudik hai chhuah mai tur a awmlaia mipui bum zawnga thusawi tawh lo turin Congress Party chuan Pu Lalduhoma kan ngen a ni,” an ti.
