Vawiin May ni 31, 2024 (Zirtawpni) hian MNF party chuan an party office Mizo Hnam run-ah chhung inkhawm an nei.
Hun hnihnaah Er. R. Rohmingliana, MLA, Gen. Secy. MNF Gen. Hqrs. chuan thusawiin, “Thudik hrula thu belhchian dawllo hmanga mipui rilru hruaipen an tum fo hi, ZPM te hian sim rawh se. SASCI sum lapse chungchanga ZPM ten MNF legislature party te public debate puia min chona hi kan ngam thuin kan chhanglet a. Kan chhanletna lehkha hi social media vela thehdarh ve mailovin, keimah ngeiin ka pe a ni. Hemi chungchang hi special assembly ngeia sawiho nise tiin kan rawt a. Tawnzau eng ha boxer ten, tawnzau pawl ha boxer te inhnek puia min sawmna hi kan pawm thlap a, boxing ring neitute an nih anga ring lo buatsaih tura kan rawtna chu a takin an ti hlawhtling ngam ta lo a ni. Social media lama debate ngamlo anga min sawi hi thubelhchian dawllo a ni,” a ti.
Er. Rohminga, MLA chuan, “SASCI sum lapse chungchanga assembly house-a ka zawhna leh ka thusawite enlet theih vek a la ni. Sum lapse hi ka ui lutuk a, sawi fo pawh hi ka duh tawh lo. Kan hlauh ang ngei ngeiin a lapse ta a. A uiawm takzet a ni,” a ti.
Er. Rohminga chuan, nimin lama PR ka chhiar pakhatah chuan, tunlai khuarel chhiatna thleng chungchangah, party pakhat chuan hamthatna lak nana hman an tum niin a lang a. Mi chhiattawhna kara hamthatna lak lo tum hi a zialo takzet. MNF chuan hetiang hi kan ti ve ngailo ang. Zoram tan enge ka tih anga, enge hmachhawp ka neih ang, tih hi kan ngaihtuah zawk tur a ni a, party dang chhiat avanga dinchhuah tum mai lovin, keimahni hi kan in enfiah fo tur a ni. Leader of opposition (cabinet minister rank) in car hlui tawh tak a dawng a, reilote hnuah an in pawh a thleng zolo. A hnua car pek leh anih pawh workshop ah a awm mek. Heng thute hi sawichhuah kher tul kan tilo a. Leader of opposition hi kan neihlohna a rei tawh avangin, sorkar lai thiltih hmaih leh fel tawklo zawng zawngte sawilan kher tul kan tilova, inchirhtheh pawh tul kan ti lemlo. Amaherawhchu, leader of opposition in car thar manto sawrkarin a lei sak, tih thuthang a awm tak avangin sawichhuah ve a ngai ta a ni. Speaker in nuai 30 dawnlai man, car a leithar zawk a ni, a ti.
