Thutak Nunpuitu Team-in Anastasia Electric Veng mipa te chiang takin an hneh

Thutak Nunpuitu Team-in rahbi pawimawh tukin ningani zan EverHome Pro Volleyball League-ah set thum set khatin Anastasia Electric Veng an hneh a, an khelh hnuhnun vawi hnihah an chak zawn.

LPS Arena, Falkland-ah Muanna Veng team-in tlak fual lai nei mah se hun pawimawhah hriam takin an inlan a, net chunga lehlam vuak dan kawngah chungnung zawk bawkin 25-17, 25-23, 13-25, 25-23-in Anastasia an hneh.

Mizo blocker tha Zosangzuala (Lalmama) chuan Kuriz Player of the Match lawmman a dawng a, point 17 hmuin tum hnih chiah a tisual. A hnunga a awm laia lehlam vuak dangtu ber K Zodingliana’n point khat hlohin point riat a hmu a, a vuak lamah TNT tan Vanlaltanchhana’n tum 20 hlap tlain point 13 a paih a, Saidingpuia Sailo chuan vawi 10 vaw tlain point ruk a hloh.

Set hmasa pahnih an lak zawn hnuah TNT an hnungtawlh nasa a; set linaah insiam thar lehin inelna boruak sangah 23-23 a nih laiin Valbuanga leh Zodinga’n an vaw tla zawn. League an khelh hmasak berah Tuichangral hneh lo nghal mah se Hunthar leh Anastasia hneh zawnin kawng dik an zawh mek.

Sihphir an hneh loh tum ang bawkin set hmasa pahnihah Electric Veng club an insiam rem nghal mai lo a, set thumna hneh taka an awpbeh hnuah an tlo zui zo lo leh a, vawi thum an khelh tawhah a tum hnih nan an tlawm.

Yougank Baliyan chuan tum 24 vaw tlain point riat a hloh a, amah chauh ni lovin Anastasia rinrawl dang Laldensanga’n tum 12 a hlap tla a, Laldinsanga’n vawi sarih vaw tla ve thungin point li ve ve an hloh a, Tuichangral an hneh tuma an khelh dan an pha lo hlawm.

Electric Veng team tan Lalrinawma’n point sarih hmuin tum li a tisual a, hloh nei lovin Helly Vanlalliana’n point nga a hlawh chhuak bawk a; an khelh hnuhnun ber aiin che tha ve ve mah se team an fuih phur zo lo a ni.

Team parukin vawi thum theuh an khel kim chiah a, TNT-in hmahruaitu Tuichangral nih rualin zan zawnin an khelh a ngai a, zirtawpni zanah Sihphir an hneh a nih chuan semifinal lut ngei tur dinhmun thaah an inhung ang.

Semifinal lut thei hniam bera awm chungin inrinni zanah Anastasia an inlan ve leh dawn a, anni ang bawka insiam that mamawh Khawbel nen an inhmachhawn dawn a, chak a pawimawh dawn hle a ni.

Pro Volleyball-a an intawn hnuhnun ber May 9, 2019 khan Anastasia-in TNT an hneh a, kum ruk hnuah a tir atangin Muanna Veng team-in inringtawk leh ngampa takin an khel ve thung. Valbuanga, Saitea leh Zodinga’n vaw tla zawn chhovin lehlam player zingah Yougank tih loh mi dang an talbuai a, 15-10-a hniam zawk an nih hnuah Electric Veng team-in Dinsanga an la chhuak.

Vuak tlak an harsat avangin set hmasa berah Anastasia an pherh a,

Densanga’n a hlap kai loh hnuah point riata inthlau chungin TNT an tlang. Set hnihna tirah Lalmama’n Ngursangzuala vuak a dansak bakah Zodinga’n Yougank-a hlap dang zui bawkin 8-3-in TNT an sang leh nghal a, Lalmama’n a vuak tlak hnuah Densanga hlap an dang a, 18-12-in hma an hruai leh.

Densanga’n tisual zui lovin hun tha a neihah point hlawh chhuak zelin a vuak tlak zawn hnuah 22-23-in Anastasia-in an hnaih chilh a, boruak a sang zui hle. Point hniha inthlau chung leh point khat hmuh belha set la zawn thei turin Lalmama’n TNT a kal hmapui a, Helly chuan vawi khat dang mah se 24-23-a sang zawk an nih laiin dan theih lohin Valbuanga’n a hlap tla.

Harsa lova chak tlang thei mai turin TNT lakah beiseina sang tak a awm hnuah inkhel boruak a inthlak thawk a, set thumna tir atangin Anastasia-in na takin an nawr let. Muanna Veng team-in vuak tlak an harsat ve thung a, Electric Veng team-in nuam ti taka an khelh bakah tute pawh rin ngamin an inlan a, point 12-a inthlau chungin set an la.

Set linaah TNT insangmar ve lehin 11-11 a nih hnu atangin hmahruaitu an ni chho a, Anastasia rinrawl Yougank-a’n point hnih a hloh zawn hnuah 21-18-in an sang a, 23-20 a ni zui bawk. Mahse, nuamsa takin an tlang thei bik lo.

Densanga leh setter Ramdintluanga’n point an hmuh kar lakah Muanna Veng team tan Sadraka’n a hloh a, 23-23-in Anastasia-in an nih rual. Hun pawimawhah Valbuanga’n TNT tan point a hmu a, lehlamin nih rual leh theihna hun tha an hloh hnuah Zodinga’n a vaw tla a, deuce ngai lovin an chak a ni.

STATS

TNT

Zosangzuala : point hmuh 17, point hloh 2

Vanlalṭanchhana : point hmuh 20, point hloh 13

K Zodingliana : point hmuh 8, point hloh 1

Saidingpuia Sailo : point hmuh 10, point hloh 6

Sadrak Fanai : point hmuh 7, point hloh 3

Ramdinpuia : point hmuh 1, point hloh 2

ANASTASIA

Yougank Baliyan : point hmuh 24, point hloh 8

Laldensanga : point hmuh 12, point hloh 4

Lalrinawma : point hmuh 7, point hloh 2

Laldinsanga : point hmuh 7, point hloh 4

Helly Vanlalliana : point hmuh 5, point hloh 0

POINT TABLE

TUICHANGRAL : Play 3, Won 2, Loss 1, Point 6

THUTAK NUNPUITU TEAM : Play 3, Won 2, Loss 1, Point 6

KHAWBEL : Play 3, Won 2, Loss 1, Point 6

ANASTASIA ELECTRIC VENG : Play 3, Won 1, Loss 2, Point 3

SIHPHIR : Play 3, Won 1, Loss 2, Point 3

HUNTHAR : Play 3, Won 1, Loss 2, Point 3

FIXTURE

MAY 9, 2025 (ZIRTAWPNI) – 8:00 PM

Sihphir v Thutak Nunpuitu Team

MAY 10, 2025 (INRINNI) – 8:00 PM

Anastasia Electric Veng v Khawbel