Labour, Employment, Skill Development & Entrepreneurship (LESDE) changtu Minister Pu Lalnghinglova Hmar chuan vawiin khan Government Industrial Training Institute (ITI), Aizawl ah khuallian niin Toyota Technical Education Program (T-TEP) chu a hawng.
Training programme hnuaiah hian Toyota Kirloskar Motor Private Limited (TKM) chuan Govt. ITI a zirlaite tan General Technician (mechanic) course zirtirna a pe dawn a. He inkawmah hian LESDE Director Pu John Tanpuia chu khualzahawm a ni.
LESDE Minister chuan thalaite tana tangkai em em tur thiamthil zirchhuahna bung thar a inhawng leh ta chu lawmawm a tih thu a sawi a. Mizoram sorkar chuan thalaite’n chhawr tlak thiamna an neih theih nan kawng hrang hranga hma a lak thu leh a bik takin Skill Development and Entrepreneurship atana theihtawp a chhuah thu a sawi a. TKM nen thawhhona zarah hemi kawnga tangkai tak tur ‘Toyota-Technical Education Program’ hmalakna chuan zirlaite tan industry lian tak takahte thawh theihna kawng a hawn theih a beisei thu leh, chutiang tur chuan zirlaite pawh tih tak takna nen theihtawp chhuah a zir turin a chah bawk a ni.
Toyota Technical Education Program (T-TEP) hi kum 2006 khan bultan niin India ram state hrang hrangah ITI/Polytechnic /diploma institution dangte thawhpuiin zirlai thahnem tak an lo train chhuak tawh a. Mizoram hi he programme an kalpuina state 27-na a ni. Training na hmunhma institute in a lo neih sa te chu an company standard mil turin a tul dan anga thuam tha in, Course atana material/equipment ngai zawng zawng chu Toyota Kirloskar Motors in an tum a. Zirtirtu tur company in a train chhuah hmasak bakah guest instructor an kal thin bawk a. Govt. ITI a thawktu Pu Vanlalthafamkima leh Pu Lalhriatrenga te chu he Course zirtirna pe tur hian training an lo paltlang tawh a. Course hi kum khat chhung a rei niin course tawpah exam an pass chuan Toyota Certificate pek an ni ang. Tun tumah hian mi 24 an training phawt ang.
Toyota Kirloskar Motor Private Limited Executive Vice Chairman leh Country Head ni bawk Pu Vikram Gulati chuan thu sawiin, he hmalakna hmanga thalaite tan eizawnna kawng siam chu an thil tum lian tak a nih thu a sawi a. Pu P.A Balusubramanaim, General Manager chuan T-TEP chungchang sawifiahna neiin, Vice President Pu Arun G. Nair chuan zirlai pahnih hnenah Scholarship a hlan a. Zote Toyota aiawhin Pu Zorammawia Tochhawng chuan thu a sawi bawk a. General Manager Pu Sachin Sharma chuan lawmthu sawiin hun a khar a ni.
