India ramin zalenna a hmuh champha vawi 75-na puala Azadi Ka Amrit Mahotsav hmanna kal zelah, Border Security Force 163 battalion bultumin sipaite leh Tlabunga Zodin ṭhalaiten football an khêlho.
BSF 163 battallion hotute ruahmannaa buatsaih football friendly match hi sipaite leh tualchhung mite inkara inpumkhatna leh inunauna vawn nun zelna tur a ni tih, he hun hmanpuitu BSF 163 battalion Comandant Pu Krishan Kumar Singh chuan a sawi a, infiamna leh ruihhlo chu thil inhal tlat, kalkawp thei ngai lo tur a nih avangin infiammi hlawhtling ni tur chuan ruihhlo laka fihlim a tul thu leh, mahni inthunun theihna self discipline neih a pawimawh thu, Commandant Pu Krishan Kumar Singh chuan a sawi bawk.
He inelnaa lawmman zawng zawng hi BSF 163 battalion-ten an tum vek bakah ei leh in pawh an buatsaih nghal a, friendly match hi BSF officer ṭhenkhat bakah khawtlang hruaituten chhimin a hmunah an thlir bawk a ni.
