Vawiin January 13, 2025 Thawhtanni chawhma dar 11:30 hian kumin atan MNF Office Mizo Hnam Run hawnna inkhawm neih a ni a. Party mipui tam tak kalkhawmte hnenah MNF President Pu Zoramthanga chuan thuchah sawiin – “inthlana tlaknate hi vanpui chim ang maia ngaih tur a ni lo, a dawt atan kan chakna tur a ni,” a ti.
Pu Zoramthanga chuan, “MNF mipuite fuihtharin inthlana kan tlak avangin kan lunghnur viau a. Mahse tuna sorkar pawh hi kum khat chauh an la kal a, an chuti an khati kan ti ta sup sup a nih hi,” tiin ZPM sorkar, reilote chhunga an thiltih thenkhat a sawi.
“VC thlan hun pangngai chu August thla lam tur a ni a, chhan tha tak awm miah lovin ZPM sorkar martial law-in February-ah thlan tur tiin an pawh tawisak a. Hei hi a nihphung tur a nih loh avangin an Minister-ten an insawifiah siak a. Chhuanlam tur pawh an sawi dik thei lo. VC Association lam chu High Court-ah an zualko ta a, tunah hian an ngaihtuah dawn mek a ni,” a ti.
Lengpui airport chungchang sawiin, “Air Force kuta pek an tum ngawtte kha khawvela awm mgai lo a ni. Sipai kuta kan hrawk rehtir tlat ang a ni a. Keini chuan a tawp thlengin kan do zel dawn.
“Buhfai man a letin vawi lehkhatah an tito thut hi tha kan ti lo. Hetiang chuan kum 2028-ah MNF tlinpui kum a thlen ka ring. Buhfai man pawh kan ennawn ang. Petrol leh diesel pawh cheng hnih khat mai ni lo, cheng sariha an tito thut hi MNF chuan kan ngaihtuah tha leh dawn,” a ti.
“SASCI pawh an duh danin an han kalpui a, kan hnathawh sa chhunzawm lovin an insem a, utiization certificate an pek mumal theih loh avangin kum khata Rs. Vbc 500 vel hmuh thin kha, Rs vbc 250 chu an chan der tawh a ni,” a ti a. Kumin hian Delhi khawngaihna an dawng lo a nih chuan an buai hle dawn niin a sawi.
Kawngpui chhe lutuk chungchang pawh PWD engineer mithiamte pawhin tun hi kawngpui chhiat ber tum a ni tih thu leh sorkar kal tawhte hun lai aiin a chhe zawk, a ti.
ZPM sorkar financial management chu a ngaihna awm ngang lo tih sawiin, “A hmaa min demna zawng zawng kha tunah chuan an hmachhawn ve ta a. Hlawh tur an puk reng a, contractor bill an pe thei lo a. Khawiah pawh pawisa van thu bak sawi tur a awm lo,” a ti.
MNF President Pu Zoramthanga chuan, “Election-a tlak chang a awm, a chhan pawh chi hrang hrang a awm ang. Pathianin MNF hi chhan neiin a din a, a ral a phal lo, a man tam tak kan pe a ni. Inthlanah tla mah ila, a dawtah kan ding chhuak leh mai. Party tam tak an ral hnuah pawh MNF chu hotu an liam pawhin Pathianin a dang a dah zel.
“MNF hi Lalpan Mizo hnam chanchintha hrilhna kawnga hruai turin party dang zawng zawng zinga a thlan bik a ni. Min duat bik a, tawrh pawh kan tuar nasa bik. Inthlana tlakte hi vanpui chim anga ngaih tur a ni lo. A lehpeka kan thawhlehna tura kan chakna hmanrua a ni,” tiin party mipui thlamuang taka awm turin a chah a ni.
MNF President hian Pu Ralthuama Ralte, Bethlehem Vengthlang (former Jt Director, UD&PA) chu MNF-ah a lawmlut bawk a ni.
Inkhawm hi Dr. R. Lalthangliana, MNF Sr. Vice President-in a kaihruai a. Upa Lalrammawia, Adviser MNF GHQ-in hunserh a hmang bawk.
