Congress Thalai chuan thuchhuah siamin, “MPCC Elected OB-te Mizoram a District tin tlawhchhuah programme chu Pathian hruainain zawh fel a ni ta a. October ni 4-7, 2022 chhung khan Khawchhak Tlangdung District pathum Saitual, Khawzawl leh Champhai te tlawh a ni a. Ni 7 october,2022 khan East Tuipui leh Hrangturzo bial khaw thenkhat tlawh a ni bawk.
“MPCC Elected OB Mizoram District tlawhchhuah programme hmasa ber hi February ni 18, 2022 khan Kolasib District tlawh a ni a. A thawh hnihna ‘Chhim Hrut Fehchhuah’ ni 23-26.3.2022 chhung khan Lunglei, Lawngtlai, Siaha, Hnahthial leh Serchhip District tlawh niin, thawh thumna ‘Khawthlang Fehchhuah’ ni 1-3, April, 2022 chhung khan Mamit District neih a lo ni tawh a ni,” an ti.
Thuchhuahah chuan, “Hripui leng leh fur ruahtui tlak vanga leimin leh harsatna tam tak karah Pathian hruainaa MPCC Elected OB Mizoram District tlawhchhuah programme zawh a ni ta hi MPYCC chuan lawmawm kan ti a. Party mipuite leh Mizoram mipui nghakhlel taka min lo dawngsawnga sorkar tha siam tura phur taka an lo tel zel hi Pathian remruatna fel zia leh rintlak zia lannaah MPYCC chuan kan ngai a ni. Khawchhak tlangdung Mipui zawng zawng chungah lawmthu kan sawi a, Sorkar tha siam tura lo tel zel turin kan sawm bawk a ni.
“MPCC Elected OB-te District tlawhchhuah programme thawh 4-na Khawchhak Tlangdung Saitual, Khawzawl leh Champhai District tlawhah hian Congress party boruak nasa taka kaihthawh a nih bakah Congress Party-in Manifesto No. 1 a release in Mizoram mipui ngaihven a hlawh hle a. Party hrang hrang atang leh Neutral atangin mithar 770 zet Ram leh hnam tana in pe Congress party ah lawmluh a ni hian Congress party boruak that chhoh leh zia a tichiang a ni.
“Khawchhak Tlangdung Fan Programme-ah hian MPCC Elected Office Bearer pathum – Pu Lalsawta, President, Pu Lal Thanzara, Vice President leh Pu Zodintluanga Ralte, MLA & Treasurer, MPCC te te bakah Aizawl atangin Party hruaitu mi 60 vel an tel tluan thei a. Saitual Programme a tel, ADCC Organiser Pu Lalrinawma, Armed Veng, motor accident avanga a boral chu pawi kan tiin a chhungte kan tawrhpui takzet a, midang hliam te pawh Pathian zarah an dam that thuai kan duhsak takzet a ni,” tiin an tarlang bawk.
