Union Minister for Culture, Tourism & Development of North Eastern Region (DoNER) G Kishan Reddy chuan vawiin tlai khan Aijal Club ah thuthar thehdartu te a kawm.
He hunah hian Minister chuan International tourism mart hi India hmarchhak bial a tourism tihhmasawnna tur atana duan a nih thu a sawi a, Tourism Minister chuan kum dang angin kumin ITM ah hian foreign atanga mikhual an awmloh chhan chu hripui len hnu a hetiang event lian huaihawt leh vawikhatna a nih vang a nih thu a sawi bawk.
Tourism Minister chuan G 20 presidency India in a thlen turah India ram hmun hrang hranga conference vawi 200 chuang neih tur zingah Aizawl leh hmarchhak state khawpui hrang hrang a tel tur thu a sawi.
Hei bakah hian Hmarchhak bial a tourism tih hmasawn nan tourism task force din a nih tur thu a sawi a. Hmarchhak bial a leilung mawina te chu khualzin híp tu a nih thu te sawiin, India Hmarchhak ah khaw thlirna hmun 100 chuang siam a hmalak mek a ni a, Mizoram ah pawh hmun pakua ah Siam a nih tur thu sawiin, Prasad scheme hnuaiah Mizoram hmun hrang hrangah khualzin te híp thei tur hmun te tih changtlun a ni anga, hei hian khualzin tam zawk a hip tur thu a sawi.
GK Reddy chuan zanin hian 10th International Tourism Mart 2022 chu R Dengthuama hall ah a hawng dawn a, Hetah hian Chite veng Convention Centre te, Prasad Project bakah Bamboo Link Road lungphum pahnih a hawng bawk ang.
