Vawiin, July 28, 2023 zing kar hian Dr.Lallianchhunga, MPCC Spokesperson chuan Vaivakawn Zohnuai leimin chu a hmunah tlawhin, sorkar hmalakna hrang hrang leh ruahmanna te a en a, MZU mithiamte’n helai leimin an zir chianna pawh a hmunah a enpui nghal bawk.
He hunah hian Dr.Lallianchhunga chuan, “He lai kawngpui hi Aizawl West-I mipuite chak lakna kawngpui pawimawh tak a ni a. Mizoram a zirna In sang ber, Mizoram University panna kawng pawimawh a nih bawk avangin fimkhur leh uluk tak si a hmalak vat vat a tul hle. Karleh, August thla tir atanga University zirlaite’n zirna an chhunzawm dawn avangin sorkar lam pawh tun aia che chak deuh turin ka ngen a ni” a ti.
Dr.Lallianchhunga chuan, “He lai leimin a hmuna kal chilh a, chik taka en chuan tuichhe paihna (drainage system) tha tak chhungkaw tinin kan neih a pawimawh zia a lang chiang hle. Helai hmun chauh ni lo, hmun dangah pawh tuichhe paihna tha tak a pawimawh vek a. Sorkar pawh tun aiin hemi kawngah a khauh lehzual ka duh hle.Chhungkaw tinin kan tuichhe paihna kan uluk a ngai. MZU mithiamte pawhin hei hi an ngaipawimawh hle a. Vanduaina hi kan fimkhur loh vangin a thleng thei tih i hria ang u. Helai leimin avanga tuartu chhungkaw tan sorkarin an thlamuanna tur eng emaw tihsak thei se ka duhpui hle” a ti bawk.
Tunlaia Forest Bill sawi hlawh tak, Forest Conservation Act Amendment Bill 2023 chungchang zawhna chhangin, Dr.Lallianchhunga chuan, “He dan hi keini tlangmi, tribal te nek ralna tur atana siam a ni a. Keini’n kan tuar na hman lo a nih pawhin kan tu leh fate chuan a pawi zia an hre chiang khawp ang. State khat Forest Minister nih ve pawh awmzia a awm lo tulh tulh ang. Manipur buaina pawh tribal te chenna khua, forest humhalh hming chawia sorkarin chhuhsak a tum vanga intan a ni a. Dan hmanga innek ral tumna hi thiam taka kan do let a ngai” a ti.
