MPYCC chuan, “Tunlai Aizawl khawpui veng hrang hrangah tui a haw mumal lo a, veng tinah tui hi a haw khatin, a haw chhun pawhin a haw rei lo ṭhin hle tih thu kan dawng a. Hemi chungchangah hian Tlawng lui tui pump tur a awm leh awm loh kan finfiah tawh a, tui a tam avangin Congress Ṭhalai chuan, President Dr. Lalmalsawma hovin vawiin hian Public Health Engineering Department (PHED) E-in-C chu a Office-ah thil awmzia zawtin kan tlawh a. MPYCC President Dr. Lalmalsawma chuan kan PHED-a thawktute hripui darh nasat lai ber pawha tui an sem reng thei maite kha an fakawmin, an inpekna a ropui kan ti, a ti a.
“Tui sem a mumal loh zia Aizawlah ‘report’ a tam hle a. Mipui an mangang tak zet. Ṭhal tak tak a la ni chho dawn chauh si a. COVID-19 hriin kum hnih teh meuh min sawp hnuah, Mizoram mipui tam tak ten sum leh pai leh eizawnna thlengin harsatna kan tawk mek a, chuvangin mi tam zawk tan tui han lei maite hi thil harsa leh chhungkaw fairel bel nghawng dawt a tling,” MPYCC President chuan a ti a.
“Tui harsatna avang hian PHE-a kan hotuten theihtawp chhuaha mipui harsatna min sut kian sak turin kan ngen che u. Congress party-in tuihna humhalh a ngaipawimawh hle a, AMC Election Manifesto-ah te pawn dah a ni. Pu Zodintluanga PHE Minister anih lai khan tui a haw tam a, a haw ‘regular’ a, a haw hun tur pawh SMS a hriat lawk tir ṭhin kan ni. Khatih lai PHE Minister khan Tlawng hnar chhehvela awm YMA-te thawhpuiah sawmin tui hna humhalhna kawngah hma an la ṭha hle a ni,” Dr. Lalmalsawma chuan a ti.
Congress Ṭhalai President chan, “Congress Ṭhalai pawn Mizoram hmun hrang hranga tuihna kan neih mekte humhalh kan ngaipawimawh hle a, Mizoram mipuite leh a bik takin, ṭhangthar ten tuihna humhalh kawngah theihtawp chhuah tlang turin kan sawm bawk,” a ti a ni.
PHED Engineering-in-Chief Pu C. Lalremsiama chuan an Department harsatna tawh mek sawiin, “Aizawl tui lak GAWSS Phase-I hi litre maktaduai 10 (mld) ni khata pump tura duan a ni a, a khawl a hlui tawha a phak tawh lo a. Phase-II hi litre maktaduai 24 (mld) pump tura duan a ni. Phase-II hi khawl pahnih 12 (mld) ve ve niin, a pakhat zawk hi February thla khan kar li a chhia a, hei hian vawiin thlengin tui sem kawngah min nghawng a, ni khat a chhiat pawha min nghawng laiin kar li chhia hian min nghawng na hle rih a ni,” a ti.
“Tui Pump khawl chhia pakhat hi tunah chuan siamṭhat a ni a, a dan pangngaiin buaina awm lovin kan pump mek a. Khawl chhia siamṭhat hi la chhe leh thut thei a ni a, a thlakna tur hi kan chah mek a, Tlawng hi a kam nasat em avangin Tlawng dung humhalh nan cheng vaibelchhe za lai Phase one atan project te kan siam a. Tlawng hi a hnar lam aṭanga kan humhalh loh chuan hmalakna tur a awm lo a ni,” Er. C. Lalremsiama chuan a ti a. Hetih mek lai hian Tlawng tui a kam zel avangin ruahmanna thar an siam mek thu sawiin, E-in-C chuan Reiek lama tuikhuaha ṭhal laia Dihmunzawla lak thlak theih turin survey an neih tawh thu a sawi a, hei hi an hmalakna pawimawh ber pakhat a nih tur thu a sawiin, Ministry lamah pawh an thlen tawh thu a sawi.
