Aizawl 23, May 2022 : Sawrkar laipui in petrol man a chhiah a lak chu litre 1-ah Rs. 8 leh diesel ah Rs. 6 in a tihniam a. Rate thar ang hian Mizoram ah chuan tuialhthei bik ah hian Petrol hi cheng Rs 95.72 a ni anga, Diesel hi cheng Rs 82 .18 te a hralh chhuah tur a ni.
Inrinni zan khan Union Finance Minister Nirmala Sitharam chuan ram pumpuia tuialhthei man a chhiah lak tihhniam a nih thu puangin heng bakah hian Pradhan Mantri Ujjwala Yojana scheme hnuaia eirawngbawlna Gas a hamthatna dawng thei mi vaibelchhia 9 te tan Gas bur khat ah (Gas bur 12 thleng) man hniam zawk (Subsidy) in cheng 200 a pek a nih tur thu a puang bawk a ni. Heiti hian ramchhungah petrol man chu litre ah Rs 9.5-n a tihtlawm a nih bakah, Diesel pawh Rs 7 in a tla hniam dawn a ni.
Mizoram ah chuan Petrol Pum neitu hrang hrang te chuan he rate thar hi an dawn tawh thu sawiin an zawm ve nghal tur thu All Mizoram Petroluem Dealer Association (AMPEDA) President K Lalnghakliana chuan a sawi a ni. AMPEDA President chuan Oil company hrang hrang an nih avangin an pekchhuah zat rate erawh phailam atanga company neituten an rawn siam angin an kalpuia, chhete chuan rate in anglo deuh te pawh a awmve maithei tih a sawi bawk. AMPEDA President chuan kawngchhiat avanga tuialhthei an duh ang stock an nei theilo tih sawiin, sawrkar ina POL ah harsatna thleng avanga mipui hnena pek chhuah tur a thunun (Control) pawh awm antih rualin, Oil Company te chu sumdawng an nih avangin sum leh pai-ah duh anga an kalpui theih loh chuan harsatna an tawkve thin tho tih a sawi a, an theih ang ang chuan Petrol Pump neitute pawhin mipui ah an semzai ve tho a ni ati.
AMPEDA President K Lalnghakliana chuan tunah hian Mizoram ah Oil Company pathum Indian oil Company (IOC), Hindustan Oil Company leh Bharat Petroleum Company an awm mek tih sawiin, tunah hian Mizoram ah tuialhthei dahkhawlna hmun kan neih loh avang hian tuialhthei lakluh chungchang ah ramri buaina emaw, kawngchiat harsat vang emaw tein buaina kan tawk ta fo a, hemi harsatna awm thin sutkian nan chuan tuialhthei dahkhawlna (Oil Depot) kan mamawh takzet a ni ati.
Kawngchhiat vang emaw, ramri buai vanga harsatna a lo thlen hian an mahni thawktu lamte pawh hrehawm leh harsa tak karah pawh an intirh luih angai thin tih K Lalnghakliana chuan sawiin an thawktute hetiang dinhmun harsa tak kara tirh thin chu hrehawm an tihve viau thin tih a sawi a, Tuialhthei dahkhawlna (Oil Depot) kan neih ve ngei theihna tur hian AMPEDA ang pawhin sawrkar ah ngen nise a tul chuan Company lam dawr emaw, a hmunhma ram tur zawn chungchang ah pawh an inhuam thu a sawi bawk a ni.
