11 March, 2022 (Zirtawpni) khan Tuikual South YMA Committee Room-ah Tuikual North Branch YMA leh Tuikual South Branch YMA OB te chuan Joint Meeting an nei a. He hunah hian tun hnaia Assembly Budget Session neih zawh taka mawi lo taka Tuikual Veng hming sawi chhuah chungchangah a hnuaia mi ang hian thuchhuah an siam.
Mizoram Assembly Budget Session a Demand No. 46-na; UD&PA Demand sawi ni 3.3.2022 (Ningani) dar 12:42 p.m. a Pu Lalrintluanga Sailo, MLA, Deputy Govt. Chief Whip, Dampa Constituency Bialtu thusawi, ‘Bial fanga kan zin haw pawn Tuikual chhuk thla velah te hian Wire tih chah avanga harsatna tawh avanga, enge ni, an TV an lo en theih loh avanga, a… tiang nena in tin uaih uaih patling zan laiah ka hmu fo mai a’ ti a a sawi hi ngun takin veng chhungah kan han in chhui chiang a, hetianga thlen awm hi Tuikual North leh Tuikual South-ah an awm hriat a ni lova. Mizoram Legislative Assembly, kan State a rorelna in sang bera Tuikual Veng hming, a chenga te inngeih lo hle anga lang thei tura a sawi chhuak hi kan lawm lo hle a, veng hmuhsitna ah kan ngai. Kan State rorelna sang ber record a tha lo taka kan veng hming awm reng tur hi kan duhlo tak zet a. Amah ngei in a thusawi hi Assembly Record atanga nawh reh tir tur leh Tuikual North leh Tuikual South mipui hnena ngaihdam dil turin kan phut tlat a ni,” an ti.
