Vawiin March ni 28, 2023 (Thawhlehi) hian Dr.R.Lalthangliana, South Tuipui bialtu MLA chuan a bial chhung South Lungleng, Muallianpui, Bualpui ‘H’ leh Thingsaite fangin khawtlang hruaitute nen inkawm hona hun tha tak an nei a. Muallianpuiah hian S.Vanlaiphai Group YMA Vice President Pu K.Lalbuatsaiha, Muallianpui Group Congress Secretary leh South Tuipui Congress Block Adviser ni bawkte chhungkua voter-8 chu MNF-ah a lawmlut nghal a, lawmluh hian thu a sawi nghal.
Bialtu MLA Dr.R.Lalthangliana chuan India ram State leh UT 40 dawn awmah Minister hrang hrangte inhmuh khawmnaah a tel zin ber a rin thu a sawi a. Congress Minister tel tur an van hle thu te, central leh state-ah an tiltiak vek tawh a, Mizorama bial 5 an neih mekna hmun ramri hrula mite hi BJP ho chet nat tumna a ni a, BJP-in seat enge maw zat chhuh an tum rualin MNF pawhin MLA an neih belh a rin thu a sawi. Assembly Session an neih changa chawlh lailawka inkawm hona room-ah Congress leh ZPM MLA-te chuan tuna mi ang hi tling leh vek i la an ti thin nia sawiin, tuna mi ang vek kan tling leh dawn anih chuan MNF kan tling sa mai a tih fiamthu thin thu a sawi bawk. ZPM chu social media hmanga nasa taka politics khel thin an ni tiin, nimin LMC campaign an kharnaah pawh kalkhawm tura mipui koh nan TA/DA an pe niin amah hrilhtu an awm thu a sawi a. TA/DA pek chuan tute pawhin mipui tam tak an kohkhawm theih tur thu a sawi. ZPM chu vawi khat pawh la sorkar ve hmain an hotute inkarah thu leh hla a tam a, kohhran kan Unit ti thinte khan unit thar an din ve a, tuna MLA an neih zat pawh an nei tawh lo ang, MNF hi Pathian leh mipui zarah a sorkar leh ang, a ti.
Dr.R.Lalthangliana, Commerce & Industry Minister chuan Tuipui D- Darzokai to Bualpui H inkalpawhna tura a MLA fund hmanga Lawng lian a tuktir chu heng lai khaw chheh vel hian an hmang tangkai hle tih a hmunah a en a.
Tuipui D to Darzokai ‘Lei’ hi zawh dawn apiangin sumo tak ngial bungraw phurh pawh hlan thlak then zel a ngai a, he lei dawh tur hi Myanmar nena inkalpawhna lei tangkai tak tur a ni a. Siaha leh Lawngtlai lam atang pawha Aizawl panna kawng hnai zawk ni bawk tur a ni ang a ti. A hmalaknain Motor lian ke 14 nei pawh insulpel zur zur thei tur khawpa inkalpawhna rotling Lei lian cheng vaibelchhe 70 zet senna pawh project thehluh fel a ni tawh a, chumi hnuah revised leh a ni bawk. Nikum hmasa covid lai khan BRO lama an hotupa ber nen pawh a hmunah hma lak dan tur kan en dun tawh kha a ni. Tunah hian revenue clearance pawh kan tifel vek tawh a ti. Mizorama lei sei berte zinga mi a ni dawn a, a pawisa hi border management home ministry atanga lokal tur anih thu sawiin, sum a fel tep a, kumin chhunga a lung phum hman ngei a beisei thu a sawi. A hna thawh hun chhung hi a project a len tham em avangin kum 5/6 vel lai anih tur thu a sawi bawk.
