Nizan khan Tuipuiral Annual Sports Meet vawi 52-na Samthang Community Hall-a neih chu khuallian East Tuipui bialtu MLA, Pu Ramthanmawia’n a Kick Off.
Khuallian chuan Tuipuiral Annual Sports Meet vawi 52-na hmang tura lo kalkhawm thalaite chu zu leh ruihhlo laka fihlim tur leh natna hlauhawm AIDS laka fimkhur turin a chah a.
“Tuipuiral khaw hrang hrang atangin infiammi tam tak in rawn kalkhawm a, rilru thianghlim takin inelna thianghlim hmachhawn ila, nakin thlenga khua leh khua inhmuh thiam loh theihna lakah fimkhur turin ka chah duh che u a, he Tournament hian Tuipuiral khaw hrang hrangte inkarah in unauna tha zawk rawn hring chhuak se. He Sports Meet a lo tel zawng zawngte champion vek turin duhsakna ka hlan a che u,” a ti bawk.
Tuipuiral Annual Sports Vawi 52-na hi Samthang khuaah nghah niin January ni 13 atang ni 25 chhung hian neih tur a ni a. Mipa Football team 21 telin Match 41 a awm ang a. Volleyball mipa team 18 awmin match 39 a awm dawn bawk a ni. Kuminah hian kum danga awm ngai lo Individual Items Boxing, Feikhawh, Thalkah te telh belh a ni a, Thalkah ah mi 16 an tel dawn a, Feikhawh ah mipa 24 leh hmeichhia 5 an tel dawn bawk. Boxing a tel tur zat hi la hriat kim theih a ni lo va, tuna in report chinah mi 20 an in report tawh a ni.
Nimin vek khan Pu Ramthanmawia hian Zawlsei, Khuangthing leh Khawbungte a thlawh a. Khawbungah Bazar Shed leh VC House hawng tawh bawk.
Vawiin January ni 14, 2025 hian Khuangleng Model Village Building hawnna a neih bakah Buang, Leisenzo, Lianpui leh Sesihte a tlawh bawk a. Naktukah Bulfekzawl leh Hruaikawn , New Hruaikawn te a tlawh leh ang.
Pu Ramthanmawia hi MNF Gen. Headquarters atangin Pu Ngurzamlova Adviser, Pu PB Lalduhawma Secretary , Pu C Vanlalhmachhuana Jt. Secretary, Pu H Laldingliana Jt. Secretary, Pu Lalneihkima Jt. Secretary ten an tawiawm a ni.
