Tuirial bial bye election neih zawh taka INC official candidate Pu Chalrosanga Ralte chuan nimin nileng hian Tuirial bial chhung Mualkhang leh Khamrangah lawmthu sawina hun a hmang chhunzawm

Amah lo hmuaktu Congress party workers leh mi thahnemngaite hmaah Congress candidate lo vote tu zawng zawng chungah thinlung takin lawmthu a sawi a ni. Pu Chalrosanga chuan, ruling nilai leh MLA nei lai party kan khing chunga khati zat Congress party in vote kan hmu kha thil lawmawm tak a ni a. Inthlan puan tirh khan mi thenkhat chuan Congress party hi in ral tawh mai lo maw te an ti a. Amaherawhchu, vote sangli dawn lai mai kan hmu leh ta si khan he bialah hian Congress party hi kan lo la tha hle a ni tih a tichiang ta zawk a ni. Chuvangin, general election 2023 ah Congress party in chakna kan neih ngei theih tawh nan party-ah rinawm takin lo awm ula, thahnemngai takin tlawmna nun nen hna lo thawk turin ka chah che u a ni, a ti. Tunlai kan ram dinhmun sawiin Pu Mavala chuan, MNF sorkar kan hrawn mek hian sum leh pai enkawl a thiam loh avangin mipuite kan harsa em em a, electric bill leh thildang man te a sang chho ta em em a. Sorkar hnathawk ten hlawh an la mumal thei lova, GP fund leh pension la thei lo mi engemaw zat an awm bawk a ni. Chuvangin, mi rethei leh mi chhumchhiate tan Congress party hi kum 2023 ah a lo let leh ngei ngei a ngai takzet a. Ram sum leh pai enkawl thiam leh mi dik kan hotute hna kan thawh tir leh dawn a ni, a ti bawk.