Tuirial Jail hmun hlui humhalh a, cheibawl a ni ang : MP (RS)

K.Vanlalvena, MP (Rajya Sabha) chuan vawiin khan Mizoram zalenna sualtu Hnam sipaite tanna Tuirial jail hmun hlui a tlawh.
Tuirial Jail-ah hian Mizo Hnam sipai zalenna sualtu mi engemaw zat an tang a. He jail pindan chhung atang hian lei verh kuain October ni 16, 1979 zanlaiah mi 18 an tlan chhuak a. He thil hi vawiin thlengin ti ti ala tling a ni.
K.Vanlalvena, MP (RS) chuan, Hnam sipaiten lei an verhna hmunah hian thu sawiin, Mizo hnam pasalthate tlanchhuahna hmun hi a hlu a, thangthar, zirlaite leh khualzinte te tlawh theih turin a hmun hi MP Fund atanga cheibawl a ni dawn a. Lei verhna lai hi danglam deuh tawh mahse, lei verh kua an hnawhna lai te pawh kan hai chhuak leh anga. Zalenna sualtuten tha leh zung nasa tak senga an beihna hi a hlu a, thangthar zawk te thinlungah ram leh hnam hmangaihna thinlung kan tuh zelna tur hmun pawimawh tak a nih ka ring a ni, a ti.
He hunah hian mi 18 tlanchhuak zinga tel, Lalhminga (Hmingtea) leh Lalrengliana te pawh telin, an lei verh dan chanchin ngaihnawm takin an sawi a. Thla hnih chhung zet hmanraw mumal hmangloin feet 50 vela sei Pathian hnena tawngtai chungin an verh thu an sawi a. He leiverh atanga tlanchhuak mi 18 zingah hian mi 8 an la dam a ni.
Tuirial jail hlui hmun hma hi 38 Bn.BSF ten an luah mek a. Cheibawl a nih hmaa a hmunhma lo samfaina turin Tuirial Airfield VCP Lalthangluaia hnenah MP hian pawisa a pe nghal bawk a ni.
K.Vanlalvena hi VK Pandey, SI, 38Bn BSF leh a thawhpui te, Tuirial Airfield VC, YMA, MUP leh MHIP ten an lo dawngsawng a. BN Thangpuia, EM, LADC leh MNF General Headquarters hruaitu, Ex-MNA Gen. Hqrs President, C. Zama leh Ex-MNA hruaitu engemawzat leh PAMRA hruaituten an tawiawm bawk a ni.