Comptroller and Auditor General of India (CAG) chuan Mizoram sorkar chu Darlak leh Sihţhiang inkar kawng siam chungchanga ţul hauh lova cheng vaibelchhe 4 leh nuai 88 hman avangin a khak.
CAG Audit Report thar ber hi Nilaini khan Finance changtu Chief Minister Zoramthanga’n Assembly House dawhkanah a dah a. He report-a a lan dan chuan Darlak leh Sihţhiang inkara inkalpawhna kawng tur sialna atana detailed project report (DPR) sorkarin a thehluhah Sihţhiang khua hi Mamit district khaw dang pakhatmah nena inkalpawh lo anga ziah lan a ni a. Darlak leh Sihţhiang inkar kawng, kilometer 35 chuang hret sialna tur atan hian cheng vaibelchhe 58 leh nuai 32 chu thingtlang khua zawng zawng kawngpui a pawhtir tura ruahmanna PMGSY hnuai-ah ruahman a ni ta a. Hna thawktu contractor hian km 7 leh metre 300 chu February 2020 khan lai ţanin June 2021 khan a lai zova. Mahse, Forest clearance a awm loh avangin hemi kum vek July thla khan hna chawlhsan a ni a, PWD chuan kawnglaihna atan hian cheng vaibelchhe 4 leh nuai 88 a seng a ni.
PWD EE Kawrthah Division thil chhinchhiahna a a lan dan chuan Sihţhiang khua hi Chuhvel khua aţangin kawng km 11 a thui-in a pawh sa tawh reng a. Chuhvel leh Sihţhiang inkar kawng hi NABARD pawisa puk hmanga Rural Infrastructure Development Fund hnuai-ah cheng vaibelchhe 8 leh nuai 70 senga lo siam tawh a ni a. Kum 2016-ah hna thawk ţanin December 2020 khan siam zawh tawh a ni a. Hna thawh chawlhsan leh mai tur ni si a km 7 lek kawng laihna atana cheng vaibelchhe 4 leh nuai 88 senral a ni chu ţul lo taka sum senralnaah CAG chuan a ngai a. Sorkar pawhin kawng awm tawh sa renga kawng sial leh chu thawk zui lova tihtawp a nih tak thu hi a pawm a ni.
