BJP Mizoram chuan vawiin 3rd May, 2024 (Friday) hian Friday Political Session neiin, Lalbiaknunga, Ex-Freedom Fighter Chairman-in inkhawm a kaihruaia, Johny Lalthanpuia, State Media Convener-in IT & Media Department hmalakna hrang hrang report a pe a, Pu Vanlalhmuaka, State President-in thusawina hun a nei bawk.
Pu Vanlalhmuaka chuan, “Mizoram mipuite hi a phawvuakah chauh kan awm tur a ni lova, kan ram leh hnam leh sakhaw hmasâwnna turin theihtâwp kan chhuah tlang zawk tur a ni. ‘Kawng awlsam a ni lo’ tih hla satute hian kawng awlsam kan zawng tlat ṭhin avang hian kan ram hi a ṭhat tur angin a ṭhat theih loh phah a ni. Kan ram ṭhatna tur kawng kan zawh tur hi kawng awlsam a ni lova, mipuite kan taimak zual zel a ṭul hle, kan ram leilung hausakna leh kan thiam, kan finna te hmang ṭangkaiin, kan thlai tharte hmanga ram mipui kan chawm hi a pawimawh a, Central Sawrkar tha chakna hmanga hma kan sawnna tur kawng kan dap hi a pawimawh hle a, kan rama mi retheite hi kan chawikan a ṭul takzet a ni,” a ti.
Pu Hmuaka chuan, “Mizoram Politics hi a mak ṭhin hle a, MNF Party NDA inti siin, Congress Party an thawhpui thei tlata, hei hian NDA tak tak an nih leh nih loh an ti chiang zawk a ni. Tuna kan ram mamawh min pe theitu chu NDA a nih laia tualṭo party hlun tak MNF-in hetianga Central-a party tluchhe mek a thawhpui duh hian party tum mumal nei tawhlo an nih zia a tarlang a ni,” a ti.
Pu Hmuaka chuan sawi chhunzawmin, “tunlai hian Restaurant changkang tak takah te ualau taka zu zuar an awm ṭhin thu hi mi tam takin an sawi a, ZPM kaihhruai sawrkarin zu an zawrh ngam tak tak si loh laiin, ualau takin mipuiin zu an zuar leh si hi pawi kan ti takzet a. Kan state sawrkar khalhngil hi kan tum a ni a, kan state sawrkar hnuaiah hian kan ram leh mipuite tana ṭha lo tur a thlen hi kan duh lova, kuthnathawktute’n an thlaithar ṭha taka an hralh a, an thawh hah mila a hlawkna leh hlawhtlinna an hmuh hi kan duhsak takzet a ni,” a ti bawk.
Pu Vanlalhmuaka chuan tun hnaia video thawndarh chungchang pawh sawiin, “tun hnaiah Union Home Minister Pu Amit Shah-a’n Telangana-a a thusawi, ‘Muslim an nih avanga reservation hi kan pe bik tur a ni lo’ tia sakhaw duhsak bik BJP-in a duhlohzia a sawi chu, ‘OBC/SC/ST reservation kan hlip ang’ tia kaihlekin Social Media ah video thawndarh a ni mek a, hei hi a pawi takzet a, mipuite pawhin thudik zawk kan ngaihthlak tam a, kan zawm hi a ṭul takzet a, Mizoram mipuite hian mi thusawi apiang awih mai lo tur leh, Social Media ah pawh thudik lo thawndarh ṭhin te’n thawn darh lova, Politics dik leh Ram hmasâwnna tur lam hawite mipui ah pawh zirtirna kan pek a ṭul hle a ni,” a ti bawk.
