February 14, 2025 (Zirtawpni) hian Mizoram Pradesh Congress Committee chuan Congress Bhavan, Aizawlah Friday Political Session ah LC/VC a candidate te hnena Lawmthu Sawina an hmang.
MPCC president Lal Thanzara chuan, “Party tana inpe te zahna chibai ka buk bawk che u a. LC/VC a kan sorkar ngei theihnana thahnem ngai taka campaign a fehchhuak te chungah lawmthu ka sawi a. Min humhimtu Pathian hnenah lawmthu ka sawi bawk a ni.
“Tun inthlanna result atang hi chuan Congress party chauhin hlimna tur a nei. ZPM ten inthlan hun pangngai August-a inthlan chuan kan chhe lutuk ang e tiin term an pawt tawi a. Mahse, an beisei ang a ni lova an tan a lawmawm viau lo ang.
“MNF ten fund nen campaign an bei a, ZPM party tan sorkarna chang hlim siin Local Council/Village Council a sorkarna nei tlem hi an la awm lo. Local Council ah te hian Aizawl khaw chhungah a let dawn a tam Congress in kan la thei a nia!
“Aizawl khawpui laili ah Chanmari ah bak ZPM hian sorkarna an chang lo, Dawrpui ah kan thawhpui party te nen sorkarna kan siam a, Electric Veng, Zarkawt leh Armed Veng ah te hian Congress in sorkarna kan changa, Synod hmunpui Mission Veng ah Congress in sorkarna kan la bawk. Tin, Mizoram Chief Minister Pu Lalduhoma chenna veng Chawlhhmun ah pawh Congress party in Local Council Member kan neih belh a, Unit te an phur thar hle a ni,” a ti.
Pu Lal Thanzara chuan, “Congress in sorkarna kan siam tirh 2009 kum khan VC inthlanna ah VC 444 a la, hei hi VC awm zawng zawng atanga chhutin 80% a ni. MNF in sorkarna a siam tirh te, 2020 kuma VC inthlanna ah khan VC 327 a la, hei hi VC awm zawng zawng atangin 58.60% a ni. ZPM in sorkarna a siam hnu lawk 2025 VC inthlanna ah hian VC 266 la in 48.98% ah chauh hnehna a chang. Hei hian kum khat lek chhungin ZPM sorkar lakah mipui rinna a tlakhniam chak zia a tarlang a ni. Kum 2020 Local Council inthlanna ah khan MNF in Local Council 71 changin Congress in 5, ZPM in 2 an chang ve thung a, tun 2025 Local Council inthlanah hian Aizawlah Congress Party chuan Local Council kan neih hi pariatah (8)a pung chho tawh a ni.
“Nikum lawka Lunglei Municipal Council inthlannaah ZPM te hi hnehna sang tak nen Ward 11-ah an chak fai vek a, hemi hnu lawk kumin Local Council inthlannaah chuan Local Council 8 lek an la a ni. Hetih lai hian kum 2025 Local Council inthlanna ah chuan Lunglei ah hian Congress in hma nasa taka sawnin Local Council 6 ah sorkarna kan siam thei ta hial a ni.
“Local Council leh VC thlanna neih zawh takah rorel lai ZPM te an che tha lo hle mai. Eng vangin nge he ti tak mai a ZPM an tlakhniam kan tih chuan an thusawi leh thutiamah an ding lo em a ni. ZPM hian Pathian ram tungding turin hma kan la dawn an tia, a thu chu a mawi khawp mai. Pathian duhdan dah hmasak leh a thiltum tihhlawhtlin nana hmalak, chu chu Pathian ram thlen tir dan chu a ni. ZPM hian Pathian ram thlen nan hian hma an la em aw…
Lai ramah chuan MNF hovin kan MDC neih chhun pakhat chu sorkar min siampui la CEM ah i awm dawn nia an tia, a CEM a ni. Kan Chief Minister Pu Lalduhawma hian Areogpagi ah thu a sawiah district council hi musical chair ang maia Aizawl atanga an duh duh an dah hi tha kan ti lo, kan sorkar chuan kan ti ve dawn lo tiin a sawi a ni.
“Tuna CEM atana ZPM tena an sawm tak Pu Zirsanga hi ZPM Thalai ten corruption case a court in a convict hi keini ZPM Thalai chuan CEM ni zel tlakah kan ngai lo tia na taka press release an chhuah khum tawh a ni. Mahse, hun a kala Areopagi a musical chair ang maia Aizawl atanga lo sawinghin kan tum lo ti tu khan inlarna a hmu nge kan hre lo, thil ri ret ret a awm ta a, kan Congress CEM ni mekin Aizawl-ah Pu Duhawma ngei a rawn hmu a.
Pu Duhawma chuan nangni hian min rawn zawm duh si lova option dang kan nei hleinem a lo ti a ni.
“Autonomous Council rorelna kan sawisa kan sawisa dawn lo titu leh ZPM Thalai ten CEM ni tlaka an ngaihloh chu Chief Minister chuan Lai district ah CEM ni turin a duh ta a ni. Vawiinah hian Lai district council ah ZPM sorkar a pian dan hi mizo mipui ten hria se ka duh a ni.
“ZPM te hian Val Upa Council an nei a. CM, Minister, MLA emaw corruption a inhnamhnawih chu ban theihna kan nei ang an tih chu an power an hlihsak ta em ni? Corruption thubuai neia court in a convict mahse high court a appeal mek avanga la fihlim mai mai chu CEM ah an dah ta a ni. Corruption a fihlim tura insawi ten corruption a thubuai nei mek CEM ah an tungding leh mek a ni.
“Kan sorkar hrawn mek hian awmdan tur anga an insawi angin an awm lova. Hetiang chung hi chuan kan ramah Pathian ram min thlensak ka ring lo a ni. Kan ti ang an tih loh ang zela awm party kan hrawn hi a vanduaithlak.
He sorkar hian an chak theihna chhan BJP party a ruka sam an phiarzawm te hi khawvel hriatah an thup an tum leh si a. Kan puk ve lovang titupa chuan a puk pawp pawp mai a ni. Kan ram kal dan hi chunglam malsawmna tawngbaw zawngin kan kal lo.
“Kan ram chhan tlaka la awm hi chhan turin hma kan lak a ngai a ni. Chu mi tur chuan Mizo mipui, thalai, lehkhathiam, ram hmangaihtu te kan ram tluchhek chhan tura lo penchhuaka Congress party zawm turin kan sawm che u a ni,” a ti bawk.
