Lunglei.2nd.April.2024: Tukin zing dar 7:30 khan MPCC President Lal Thanzara chuan Lunglei Press Club ah thuthar thehdarhtute a kawm a, MPCC. M.P Candidate Lalbiakzama bakah MPCC General Secretary te Joseph Lalhimpuia, PC Laltlansanga leh LDCC President K.L. Chhawnzauva ten an tawiawm.
Lal Thanzara chuan M.P inthlan lo awm tur chu Kristian nuai chimih duhtute leh Sakhaw tihbik neilo inbeihna tur a ni tiin, hetiang anih laia MNF, M.P Candidate in a lo tling a nih chuan Kristian leh hnam hnufual zawkte nuai chimih duhtu NDA lamah thut a tum thu a sawi chu Pathian tana sengkhawmtu nilo in thehdarhtu a nih mai a hlauh thu leh ZPM Candidate in lo tling ta se a thutna lam tur a sawi ngamlo chuan kan Sakhaw Puithiamte rilru a tina a ni tiin Congress M.P Candidate kan thlantlin chuan Opposition ah lo awm palh pawh nise Kristian State kan nihna anga Kristian nekchep tumtu dodal ngam M.P kan thlan avang ringawt pawhin Khawvel hmuhah kan mawi dawn a ni a ti.
He hunah hian MPCC, M.P Candidate Lalbiakzama chuan tuna BJP sawrkar chu a Vawk lallen tawh a, Prime Minister Modi chuan Chanchinbumi tepawh hmachhawn duhlo in, Party dang hruaitute thubuai siam sak dan ringawt an buaipui a ti a, BJP hian India ramah ro an rel leh a nih chuan inthlanpui lo awm leh hunah dan hnuaiah mumal takin kan inthlang thei tawh lo ang a ti. Lalbiakzama chuan BJP sawrkar chuan Kristiante mai nilo keini Mizo mipuite leh kan tlangmi puite min hmusit em em tih sawiin, BJP sawrkar paihthla turin Mizoramah pawh Congress kan thlantlin angai a ni a ti. Zawhna chhangin Lalbiakzama chuan thlantlin lo niin Opposition ah lo awm ta nise a mal dawn chuang lo NDA a tello M.P dang zawng zawngte nen kan tangho zel dawn a ni a ti a, Assam leh Mizoram ramri chungchang zawhna chhangin Politics a hmingthat lak tum tawk leka hmalak chi a nilo tih tum tak takna nena zirchiana hmalak angaih thu leh sawrkar hna a thawh velai atanga ramri chungchang buaina chu thui tak a lo hriat ve tawh thu leh an lo chhui chian tawh thu sawiin hmalak theih dan tur ngaihtuahna thui tak a neih thu sawiin, kan in siamrem thuai loh chuan Mizoram zawk hian kan la tuar ngei ang a ti. Lo tling ta se ti a M.P Fund chungchang zawhna chu pek tam bikna emaw pek tlem bikna emaw lam angaihtuah loh thu leh a tulna leh a pawimawh dan ang zela pek mai a rilruk thu Lalbiakzama chuan a sawi.
