April ni 28,ningani, 2022 hian Dr.Lalmalsawma Nghaka, President, MPYCC leh a thawhpui MPYCC hotute chuan MADC inthlan turah 13-Saikao bial tlawhin, Saikao(Serkaw)ah Public Meeting neih a ni a.
Hetah hian thusawiin, Dr.Lalmalsawma Nghaka chuan, “MNF sawrkarah sum a harsa a, sawrkar hnathawkten an pension pawisa an la thei lo a, Kum upa zawk Tar chawmna an pe hlei thei lo a, Damlo mangang damdawiina awmten healthcare bill an la thei lo a, Sawrkar hnathawkten an pawisa dahṭhat GPF an la thei lo a, Contractorten bill lak tur an nei lo a. An party mi worker te pawh an mangangin an rum mek a ni. Chutihlaiin MNF hotupa chhungte leh a sangawizawnpui ten hna lian an hauh fai vek a, an party chhungkaw boruakah titi a titam hle a ni.
Tuna Mara ramchhunga Chakhei leh Siasih road restricted tender ṭhen hnih ngawt mai vaibelchhe 47 man MARA hotute sawi hmin fel sa, Kamrula thawh tura tihfel leh tawh a ni. Bialtu MLA leh Minister Dr.K.Beichhua-a’n MARA ram chhunga contractor te thawh ve theih, thawk ve ngeina tura nawr lova, Opposition MLA Pu C.Ngunlianchunga MLA ten Assembly Session laia a ram mite duhsak tura a tlangaupui lai a He contract thawk tura Kamrula thlan anni tlat mai hi a ruka sawihona awmin inremsiamhona a awm ru emaw ni chu aw tih mai a awl a ni.
Tun ang zela an kal chuan MNF hotu Minister leh MLA rawn campaign tam zawk te hi 2023 MLA inthlan zawha FLAM member ni mai tur anni a, Chuvang chuan nakin lawka hnathawk thei lo tur leh mahni tih theih loh tur inthlan dawn chauha tiam zela te hi hnawl ngam an ngai a,”a ti.
“Kohhran pahnih Congregational Church of India(Maraland) leh Evangelical Church of Maraland (ECM) ten inrem kum pawimawh, Mara Autonomous District Council din champha kum 50-naa MADC inthlannaah hian Kristiante nekcheptu leh tiduhdahtu BJP party vote lo turin ka ngen cheu a, Pathian zawnchhuah Mara rama meichher rawn chhiluttu kan Pioner Missionary te thlarau zahna avang pawhin Hindu lalram din tumtu BJP vote lo ka ngen bawk cheu a ni”, a ti a.
“Congress Party hi kan in tuai thar mek a, a hma aia ṭha zawka Mizoram mipui rawngbawl turin kan inbuatsaih mek a, Sorkar ṭha a awm theih nan system tha, “That Loh Theih Lohna Bawm” kan aupui mek a. Pu Lalsawta hovin Congress party a hruaitute hian mahni indah ṭhaa mipui rawngbawlnaa a inpumpekna turin ke kan pen mek avangin Congress party member mai ni lo, Mizoramah dikna duhtuten dikna atana nghet taka ding a, nasa taka ram mipuite tana an thawh theihna turin Congress Party-a kan hruaitute tan nasa taka min tawngtaipui a, thurawn min pek mawlh mawlh hi kan mamawh bawk a ni.
Ram tana kan thawhpui, Mizorama Party hrang hrang hruaitute pawh kan ṭawngṭaipui zel hi a ngai tak meuh a ni. Tawngtaina hi kan ralthuam, kan chakna leh kan himna a ni”, a ti bawk.
He bial candidate Pu IP(Jr.) pawn thusawiin “BJP hi Mara ramah an awm ngai lova, Congress MADC te hi MNF party hian sawiṭhiah tumin hma an la reng a, an mangang tal buaiin BJP an zawm ta ringawt a, chuvang chuan a thlangtute erawh chuan BJP hi an vote vak a rinawm loh a ni”, a ti bawk. Pu Lalngaihawma General Secretary,MPYC pawhin bial mipuite Official candidate vote ngei tura sawmin, tunlai politics boruak inlumleh mek dan a sawi bawk.
Dr.Mala leh a thawhpuite hi 13-Saikao biala khua; Kaochao(Kawlchaw), Saikao(Serkawr) leh New Saikao khuate tlawhin, he bial INC Official Candidate IP(Jr.) a tlin ngei an beisei.
Ni 27.4.2022 zan khan 18-Siaha North 1 Bial a, New Colony III Campaign Office hawnna neiin, mithar 21 Congress Party ah a lawm lut bawk.
Lawm luh zingah L. Bneiro, Vice President BJP Unit College Vaih-1 a tel a ni.
He bialah hian Puhpa V. Beihmosai, Mara District NSUI President Candidate a ni. Congress chak ngeina tur bial zinga chhiar tel a ni.
