MPCC Media department chuan thu chhuah siamin, “Tunlai hian Mizoram hmun hrang hrangah kawngpui chhe lutuk avangin harsatna hrang hrang mipuite’n an tawk nasa hle a. Hmun thenkhatah chuan mipuiten kawngpui an dang hial a ni. ‘MNF sorkar hnuaiah kawngpui a tha thin’ tih uang taka sawi thintu MNF te thuneihna chan laia hetiang thil a thleng hi an chapo vang leh sorkar inthlahdah hrim hrim vang niin Congress party chuan a ngai a ni.
“Congress sorkar liamtaah khan ruahsur nasat vangin kawngpui a chhe nasa hle a, a chhan chu Congress sorkar tawp lamah namen lova ruahtui a tam vang a ni. Kawng siamna hnathawhna hun (working days) a tlem a, duh angin sorkarin kawngpui an siam thei lo. Science and Technology Department, Govt of Mizoram-in a chhinchhiah danin Congress sorkar tawp lam kum 3 chhung kha a zawn zatin ruahtui 2000 mm chuang a tla a. Kum 2015-ah 2412.3mm, 2016-ah 2161.8mm, kum 2017 phei chu State puitling kan nih hnu kum 1987 aṭanga vawiin thlengin ruahtui tlak tam ber kum record a ni a, Ruahtui 2686.7 mm a tla a. Hemi kum hian Sairang VC chuan, kum 50 kalta chhunga Tlawng lui lianin a chim san ber kum a nih vangin a hriatrengna lungphun an siam hial a ni.
“Hetiang taka ruahtui a tam avang khan kawngpui siamna tura Congress sorkar sum dah sa, cheng nuai 8595.19 pawh hmanna hun a awm mumal ta lova, MNF sorkar lo piang khan a rawn hmang ta char char a ni. MNF sorkar lo piang hian kawngpui siamṭha turin vanneihna nasa tak an nei a. Congress sum dah sa an rochun bakah khua a tuihul ṭha em em a, ruahtui tlak nasat avanga Congress sorkarin harsatna a tawh ang kha MNF sorkar hian a tawk ve lova; kum 2019 aṭanga vawiin thleng hian kum tin ruahtui 2000 mm vawikhat mah a la tla tling lo nghe nghe bawk.
“Hetiang hi a nih vangin, Zoram hmun hrang hranga kawng chhiat vanga sumo service tih tawp thawm lo awm ta hi, MNF sorkar hian chhuanlam tur a nei lo va, sorkar inthlahdah vang liau liau a ni a. Assembly House-ah Mizoram kawngpui ṭhat avanga lawmthu sawina resolution an pass hial tawh avangin, kawng chhiate hi siam ṭha vat vat se la, heti chunga kawngpui an siam tha thei lo a nih chuan zahna chang hre turin Congress party chuan kan chah a ni,” tiin an tarlang.
