Mizoram Pradesh Youth Congress Committee (MPYCC) chuan, “June ni 27.2023-a ZPM Leader Guwahati-a kal, a tuk leh mai June ni 28.2023-a rawn haw leh chungchangah hian thil rinhlelh awm tak a awm niin kan hria a, thil awmzia mipui ten an hrechiang duh hle bawk a ni.
“ZPM Leader Guwahati-a a kal ni June 27, 2023 hian Aizawl to Guwahati flight-a chuang ve tho BJP Minority Morcha National Secretary nen Guwahati airport-ah motor vâr changkâng takin a lo hmuak a, an pahnih hian motor-ah chuan chuang dunin VIP treatment dawngin airport atangin an kalna tur hmun lam panin an kal niawmin a hmuna awm te sawi a awm zui ta a. North East Democratic Alliance Convener, BJP palian leh Assam CM ni bawk Pu Himanta Biswas Sarma hmu tura kal an ni tih thawm ri va kan hre leh ta zel hian ngaih a ti tha lo hle a ni. UCC implement tumna boruak a len lai leh, sakhaw zalenna nêk chêpa a awm mek lai hian heng thu lêng vâk hian Mizoram Mipuite thinglungah ngaihthat lohna a tilian hle a ni.
“ZPM Leader leh BJP Minority Morcha National Secretary te hian Himanta Biswas Sharma an hmu ngeia sawi a ni a, Ni 27-a Guwahati-a kal, a tuk mai ni 28-a rawn haw leh nghal hian BJP palian Himanta Biswas hi a hmu lo a nih chuan insawifiah turin MPYCC chuan kan phut bawk a.
“Kristian-te min nêk chêp a, min nêk ral vek duhtu BJP-te pawisa ringawt ît lo va, kan Kristianna humhim a nih theih nana ke pên zawk turin Mizoram party tinte kan ngen nghal bawk a ni,” tiin thuchhuah an siam.
