North Eastern Council chuan tunhnai khan Composite Regional Centre (CRC), Shillong nen tangkawpin a enchhin nan, Meghalaya a cheng mi 2 ke tan ngai an tansak a, ke lem hmang mek te chu tunlai thiamna thar Custom 3D Scanner Printed Prosthetics hmangin ke thar an nei theih nan hma an la nghal a ni.
Beneficiary 2 te chu Ministry of Social Justice and Empowerment hnuaia awm National Institute for Empowerment of Persons with Multiple Disabilities (NIEPMD), Chennai ah Customized 3D Scanner Printing Prosthetics siamsak turin an thawn a. Assam Electronic Development Corporation Limited (AMTRON) chuan heng mi 2 ke tan tawh te mila, khup a socket innghahna tur socket thar siam turin digital scanning an tihsak a. Scanning result kimchang chu NIEPMD, Chennai ah thawnin, helaia mithiam ten ke lem thar hmangtu turte rihzawng te, an ke in pressure a lak dante chhutin 3D Scanner Printing Technology hmangin a ke lem socket an siam a. 3D Scanner hmanga ke lem siam ah hian a socket chiah hi 3D Printing hmangin an siam a, a bak, kephah lem leh pylon (kephah leh socket inzawmna thir) te chu a siamsa an hmang thung a ni.
September ni 5 khan heng mi pahnih te hi ke lem thar (customized 3D Printed socket prosthesis) an vuahsak a. A hma aiin veivah an awlsam phah thu te leh a hma aiin a zangkhai zawk thu te an sawi. Pu Moses Chalai, Secretary NEC chuan he an ruahmanna thar enchhin hian ke lem hmang mek mi tam tak tan kawng thar a hawng thei dawn nia a ngaih thu a sawi a. Ke lem siam nan vawi tam tak an kal a ngai dawn lova, vawikhat scanning an tih zawh chuan ke thar hi a siam thei mai dawn a, prosthetics lamah hmasawnna tangkai tak a ni, a ti bawk.
NEC chuan he thiamna thar hmanga prosthetics mamawh te’n an tangkaipui theihna turin hemi kawngah Ministry kaihhnawih te, Hmarchhak state te, AMTRON anga agency te thawpuiin hma an lak tum thu an sawi.
