Tuichawng bialtu MLA Dr. Buddha Dhan Chakma leh a nupui Biro Bala Chakma te chu an sum leh rohlu neihte chhuichian sak an ni dawn.
United Chakma Alliance (UCA) chuan MLA Dr. BD Chakma hausakna chungchang chhuichiang tur hian 2020 December 26 khan Mizoram Lokayukta ah complaint an thehlut a, Lokayukta hian a zirchian hnu ah case ziaklutin, Anti Corruption Bureau ah preliminary enquiry ti turin 2021 January 21 khan a hlanchhawng a, ACB hian preliminary enquiry report hi kumin September 21 khan Mizoram Lokayukta ah hian a thehlut a, Ocotber 11 khan hearing neih niin, hetah hian complaint thehluttu lam leh an puha te lam hi an inlan ve ve a ni.
ACB preliminary enquiry hi 2013 MLA inthlanpui leh 2018 MLA inthlanpui neih dawna Dr BD Chakma elction affidavit behchhana kalpui a ni a, amah bakah a nupui Birlo Bala Chakma sum lakluhna lam zirchian ni bawkin, a pasal-in election affidavit-a a tarlan tel loh sum leh ro dang a neih leh neih loh chhui a ni. Lak sawn/ che sawn thei thil hlui an neih leh ram leh in leh lo an neihte enmil a ni bawk.
2013 MLA inthlan dawna an chhungkaw rosum neih affidavit-a a dah dan chuan, dahsawn theih bungrua leh dahsawn theih loh bungrua belhkhawm hi Rs. 1,71,25,525.80 a ni a; 2018 inthlana a tarlanah chuan Rs. 3,34,33,498.20 niin, he kum 5 chhunga a inthlauhna, an neih belh hi Rs. 1,63,07,973.00 a ni. Behchhana an hman 8.11.2013 leh 6.11.2018 inkara an chhunga sumfai leh thildanga an hmanral zawng zawng (total expenxe) chu Rs. 1,74,39,096 niin, assests an neih lai leh an hmanral belhkhawm chu Rs. 3,37,47,068 a ni. Hemi hun chhung veka an sum lakluh leh thil hlu an neih belh belhkhawm (total income) chu Rs. 2,41,04,490 a ni thung a, lakluh zat aia tam a neih belh (disproportionate assets) zat chu Rs. 96,42,578 niin, sum lakluh zat a sawi aia za zela 40 nei ang a ni tih preliminary report-ah hian a hmuh theih tih Lokayukta hian a sawi a ni.
Election affidavit-a tarlan bak bank account dang emaw sumfaia kawl emaw Dr BD Chakma nupui Birlo Bala Chakma leh an faten an nei lo tih ACB hian an report ah an sawi a. Birlo Bala Chakma hi company pakhat Aryomitro Construction Private Limited ah director niin he company hi kum 2013 khan Company Act hnuaiah a inziaklut a, a tak taka hnathawh a neih loh avangin sum lakluh pawh a nei lo tih report ah hian an tarlang bawk.
Hemi ang hian Mizoram Lokayukta chuan sum leh thildang lakluh nia sawi leh sum leh rohlu dang neih danah thil inmil lo a awm ngei nia hria in, invetigation puitling nei turin ACB kutah a hlan tih sawi a ni.
United Chakma Alliance president Rustom Chakma chuan an pawl chu Chakma area-a eirukna leh hlemhletna do tur leh tireh turin kum 2015 khan din a ni tih sawi a. Dr BD Chakma bakah hian Chakma Autunomous District Council chairman hlui Kali Kumar Tongchangya, deputy chairman Purna Munni Chakma leh personal secretary Julius Tongchangya ten CADC sum an tichingpen nia an hriatah leh Chawngte SDO (Civil) hlui S Kaptluanga’n MGNREGA sum a tichingpen nia an hriatah pawh chhuichian sak turin Lokayukta ah hian complaint an lo thehlut tawh tih a sawi a ni.
