Vawiin Dt 11/05/2022 (Nilaini) khan MNF Thalai chuan Vice President Pu Lalzahawma Khiangte hovin Ramhlun-Chaltlang Road, DIET peng kawng, UD&PA leh Mizoram PWD tangkawpin an siam mek tlawhin, hnathawh dan leh hma an lak tawh chin chu a lawmawm an tih thu an sawi.
He hunah hian Pu Zahawma Khiangte, MNYF Vice President chuan thusawiin, “Mizorama hmasawnna ruhrel lian ber ber hi MNF ministry kutchhuak a ni a, kan khawpui ber Aizawl phei chu MNF ministry thuam mawi a ni ber. Vawiinah pawh helai hmuna kal thinte chuan kan hria ang a, helai kawng chhukchho ingeuh tak thin kha nuam taka siam a lo ni ta hi lawmawm kan ti a, mipuite’n sorkar tha kan neih avangin hetiang hmasawnna a lo awm a ni tih an hriat kan duh a, kan tlawh a ni,” a ti.
MNF Thalai Vice President chuan, “State-a hmasawnna awm tur chuan hnathawhna tur sum leh pai kan mamawh a, state intodelh lo kan nih avangin sorkar laipuia sum sawi chhuak thiam hi an pawimawh hle a. Chutiang ni tur chuan kan pu ber Chief Minister zahawm tak Pu Zoramthanga hian distinction a pass zak a. Budget head-a hmuh tur awm ngai lo ‘Buffacos’ te, ‘Peace Bonus’ te, ‘Bamboo Link Road’ te hi a sawi chhuak thei zel a, heng hmasawnna a sawi chhuahte hi hmarchhak state dangte tana thikawm thiau a ni.
“Tun hnai kum 3 chhunga Zoram kawngpui a that sawtzia te hi hai rual a ni lo. Congress sorkar lai te chuan kum tin fur ruahtui tlak lai hian kawngpui siama mipui hnatlan thu hriat tur a tam hle. Tunah erawh chuan mipuiten kan phu ang ngei kawngpui tha kan hmu ta a, hei hi inkalpawhna tha ngai pawimawhtu MNF sorkar kan neih vang a ni,” a ti a, “Aizawl traffic tawt avangin kan buai ta hle mai a, hemi atan hian sorkar pawhin ngaihtuahna a seng a, theih tawp a chhuah ve bawk. Aizawl chhuah lamah khawpui hêlna, MNF sorkar hmasak hun laia siam World Bank Road chu kawngpui lûn tak a ni tawh a, Aizawl tlak lama khawpui hêlna tur pawh rei lo têah hma lak tan a ni dawn bawk. Tin, Aizawl lei verh dan tur leh kawng chhawng siamna turin mi thiamten zir chianna an la kalpui mek bawk. Hengte hi a hlawhtlin hunah chuan Aizawl traffic tawt lutuk a ziaawm phah ngei a rinawm a ni,” a ti bawk.
“MNF sorkar hian ram rotling tur hmasawnna bakah mipui mimir ban phak hmasawnna a thlen thin avangin mipui sorkar tih loh theih a ni lo va; hun lo la awm zel turah pawh MNF ministry hi development kalpui nasat ber hun a nihzia chu thangtharte hriat reng dan tur a ni,” tiin MNYF Vice President hian a sawi bawk a ni.
