Under graduate exam-ah zirlai 86.80% an pass

Mizoram University chuan a hnuaia college zirlai, under graduate final exam a buatsaihah June 22 khan result a tichhuak a, zirlai exam 4819 zinga 4183 an pass a, pass percentage hi 86.80 a ni. Hemi rual hian professional course thenkhat result leh 2nd & 4th semester result tihchhuah a ni bawk.
MZU Examinations Department-in undergraduate exam result a tihchhuahah hian Bachelor of Arts ah exam zawng zawng 4017 awmin 3437 an pass a, percent hi 85.56 a ni. Bachelor of Science ah zirlai 540 exam zingah 493 an pass a, pass percent 91.30 a ni. Bachelor of Commerce ah 244 exam atangin 235 an pass a, percent hi 96.31 a ni. Bachelor of Science (Home Science) ah zirlai 18 exam an pass vek (100%) a ni.
Arts stream ah hian Govt. Zawlnuam College (8) leh Helen Lowry College (15) atangin zirlai exam zawng zawng an pass vek a; Science stream-ah Pachhunga University College an titha ber a, zirlai 259 exam-ah 244 an pass a, za zela 94.21 a ni. Commerce ah Govt. J. Buana College (7), HATIM (13), Helen Lowry College (7) leh St. Xaviers’ College (6) atangin candidate an pass vek a ni.
Pachhunga University College zirlai Lalruatsanga (Economics honours) chu BA zirlai zingah grade hmu sang ber a ni a, cummulative grade point average (CGPA) 9.38 hmu in gold medalist a ni. B.Sc. zirlai zingah Lalparvuli, Govt. Zirtiri Residential Science College chu CGPA hmu sang ber niin 9.64 a hmu a, BSc gold medalist a ni. Botany subject honours a ni. Commerce subject-ah Lalmalsawmi, Govt. Hrangbana College-in CGPA hmu sang berin 9.11 ahmu a, gold medalist a ni. Lalremkimi, Govt. Zirtiri Residential Science College chu Home Science-a gold medalist niin CGPA 8.60 a hmu a ni.