Sawrkar Laipui Ministry of Women & Child Development leh Ministry of Minority Affairs te changtu Union Cabinet Minister Smt Smriti Zubin Irani chuan vawiin khan Lunglei lo thlengin DC Conference Hall ah Lunglei District Head of Offices te inkawmhona a neih pui.
Meeting-ah hian Lunglei District-a Department hrang hrang hnuaia sawrkar laipui scheme (Centrally Sponsored Schemes) kalpui mekte dinhmun leh hmachhawpte sawiho a ni. Sawrkar official-te chu mipui rawngbawltu an nih angin theihtawp chhuaha an hna thawk thin turin a chah.
Smt Smriti Zubin Irani chuan District hmasawnna chu Head of Office kalkhawmte kutah thui tak a innghat tih sawiin, an hma zawn theuha hna chanpual leh tihtur awm te uluk leh taima taka thawk zel turin a chah a. An hna kalpui danah District mipuite hmasawnna leh hamthatna dah pawimawh hmasa thin turin a chah bawk. Mipuiten sawrkara an harsatna thlen theihna tur Public Grievance Cell din te, tar leh pianphunga rualbanlote tan a camp buatsaih te, kuthnathawktute tan tangkai zawka scheme thenkhat thlunzawm (convergence) te ngaihpawimawh a tul tih sawiin, hna an thawhnaah harsatna leh mamawh an neih chuan tanpui turin sawrkar a inpeih reng tih kalkhawmte chu a chah bawk a ni.
Meeting-ah hian Lunglei Deputy Commissioner Pu Kulothungan A chuan Lunglei District dinhmun tlangpui leh sawrkar hmalakna langsar zualte sawiin Presentation kaltlangin a tarlang a. Central scheme kaltlanga Department hrang hrangte hmalakna heng – tui hna humhalhna Amrit Sarovar; thingtlang kawng siam Pradhan Mantri Gram Sadak Yojana (PMGSY); thingtlang in tina tui connection pek chhuah Jal Jeevan Mission; thianghlimna leh bawlhhlawh sawngbawlna kawnga hmasawnna Swachh Bharat Mission; mitin banphaka health facilities chhawpchhuah National Health Mission; buh leh bal tharchhuah tihpun a intodelh National Food Security Mission; Women & Child Development hnuaia nu leh naupang te hamthatna leh hmasawnna ngaihtuah scheme hrang hrang; NH-54 leh NH-302 kawng laih mek te chu chipchiar taka zirchian leh sawiho a ni.
Minister hi Dr Lalrozama, IAS, Secretary, Sports & Youth Affairs & DC&MA Department leh Pi Lallianpuii, Director, Women & Child Development, Social Welfare & Tribal Affairs Department ten rawn tawiawmin Kawmzawl Helipad, Lungleiah Deputy Commissioner Pu Kulothungan A, IAS leh District official dangten anlo dawngsawng a ni. Minister leh amah zuitute hian chawhnu lamah Aizawl panin an let leh nghal a ni.
