Sadhvi Niranjan Jyoti, Hon’ble Union Minister of State, Rural Development, Consumer Affairs, Food & Public Distribution, Govt. of India chuan vawiin khan Mamit tlawhin Tourist Lodge, Mamit-ah Mamit Bawrhsap leh SP, Mamit te’n an lo dawngsawng a. DC Conference Hall, Mamit-ah Beneficiaries hrang hrangte, Khawpui chhung Sorkar Department hrang hrang hotute leh khawtlang hruaitute nen inkawmhona neih zui nghal a ni.
Union Minister chuan Prime Minister Narendra Modi kaihhruai Sorkar laipui chuan ram intodelh kan nih theih nan theihtawp a chhuah thu sawiin abik takin hmarchhak bialah hmasawnna hna kalpui mek a nih thu a sawi a. Hmasawnna hna kalpui laiin hniam chang leh san chang a awm thin a, tha thlah lova theihtawpchhuah zel turin District tana thawktu Officials leh khawtlang hruaitute a chah a ni. Sorkar hnathawh chauh nilo themthiamna hmanga eizawnna tur kawng zawng turin a chah bawk.
Kum 2014 atangin thalaite skill development atan Sorkar laipui atangin sum tam tak pek an nih tawh thu sawiin MGNREGA bakah hmeichhiate chawikanna atana hmalakna kalpui mek a nih thu a sawi a. Sorkar laipui atanga Schemes hrang hrang kalpuite ramri kham bik leh thleibik nei lova anihna ang taka hmang thin turin a chah bawk.
Beneficiaries, Officials leh khawtlang hruaitute nena inkawmhona tha tak neih anih hnu hian Officials te hnathawh dan leh hmalakna chungchangah zawhna leh chhanna hun hman nghal niin Sorkar Schemes hrang hranga Beneficiaries-te pawhin Minister hnenah hian lawmthu an sawi bakah an harsatna te an lo thlen bawk.
Lalnunhlua, Mamit District Bawrhsap chuan Keynote address pein lawmthu sawina a nei bawk.
Union Minister hi a ministry chan Consumer Affairs leh Rural Development hnuaia Deputy Secretary pahnihin an tawiawm a. An ministry hnuaia an hnathawh tlangpui sawina hun hman nghal a ni bawk.
Vawiin vek khan ama puala I&PR Conference Hall-a Self Help Groups te’n Exhibition an buatsaih chu Union Minister hian a tlawh nghal a. He Exhibition-ah hian Mamit District chhung RD Block 3, Zawlnuam, Reiek leh W. Phaileng atangin Stall 4 hawn a ni a, heng stall-ah te hian mizo kutthemthiamna hmanga dehchhuah leh tharchhuah hrang hrangte lei theih tura phochhuah a ni.
Mamit District chhunga SHGs te thil siamchhuah hi India ram khawihmunah pawh thawn chhuah theih turin Amazon leh Flipcart kaltlanga hralh chhuah tura ruahmanna siam a ni a. Hmeichhiate hmasawnna tur leh intodelhna turin Sorkar chuan hmalakna chak takin a kalpui mek bawk a ni.
Exhibition hi H. Lalchhandami, CEO, MzSRLM-in kaihruaiin he hunah hian SHGs Member-te atangin an success story ngaihthlakna hun hman a ni bawk.
