Aizawl May 30 : Union Minister of State for Education and External Affairs Dr. Rajkumar Ranjan Singh chuan Inrinni khan Mizoram University a Research Scholars’ Hostel leh Faculty Development Centre a hawng.
Union MoS Dr. Rajkumar Ranjan Singh chuan thu sawiin Research Scholars’ Hostel leh Faculty Development Centre hawng tura sawm a ni chu lawm awm a ti a. Mizoram University chuan kum 2022 Impact Ranking a neih phak a vangin a chhuang hle tih a sawi a, Mizoram University chu India ram chhunga National Education Policy 2020 hmang hmasa pawl University a nih avang pawhin a lawmpui thu a sawi a ni. Hemi rual hian Mizoram University leh Mizoram Sawrkar chungah lawmthu sawiin, education hmasawnnan tha hnem ngai taka thawhhona tha a awm avangin Mizoram University Campus leh Pachhunga University pawhin nasa takin physical infrastructure ah hmasawnna a nei a ni ti a a. University hamthatnan central sawrkar chauh hmalakna a tawk loh thu leh state sawrkar nena thawhona tha a pawimawh tel thu a sawi bawk a; Mizoram University, South Campus hmalakna chungchanga harsatna an tawhte chu a hriatpui thu leh a fel thuai theih nan hma a lakpui tur thu sawiin vawiin a hawn Building pahnih te chu tangkai taka hman a nih theihnan duhsakna a hlan bawk a ni.
Mizoram University Vice Chancillor Prof. K.R.S Sambasiva Rao pawhin thu sawiin academician ni bawk, Member of Parliament ni bawk Union Minister of State Dr Rajkumar Ranjan Singh chungah lawmthu a sawi a, Mizoram University a thawktu zawng zawngin anlo lawm a ni tih a tarlang a. MZU chu India ram a research project hmu hnem ber pawl a ni tih tarlangin, Covid-19 pandemic chhungin Rs 100 crore chuang hmuh a ni tih a sawi bawk a, North East chhunga University project hmu hnem thei ber a ni tih a sawi bawk a ni. Covid chhungin MZU chuan webinars, seminars leh meeting 700 chuang a buatsaih theih thu leh India ramah pawh research papers
publish hnem ber leh tha ber pawl a nih thu a sawi bawk a, hmasawnna tam tak ngai la awm mah se, Mizoram University thawktute inpekna a zarah India ram University zinga upa lo tak ni mah se tha ber pawl a nih thu a tarlang a ni.
Reseach Scolars Hosterl hi NEC fund niin Rs 5.9 crore a sak a ni a, kum 2016 atanga sak tan a ni a. Implementation agency hi Manipur Tribal Development Corporation a ni a, a zau zawng hi 435 Square metre a ni a, Research Scholars (girls) 78 an leng a, Room 39 a awm a, room khat ah scholar pahnih zel an awm thei dawn a, Ground floor bakah floor pathum dang a awm bawk a ni.
Faculty Development Centre hi Ministry of Education hnuaia sak a ni a, Pradan Madan Mohan Malviya National Mission on Teachers and Teaching hnuaia sak niin kum 2019 July khan sak tan a ni a, Rs 3.14 crore seng a sak a, kum 2021 December khan sak zawk a ni a. Floor thum nei Building a ni.
Union Minister of State hian MZU a kal hmain Pachhunga University tlawhin campus a hmunah kalin a en a, a thawktute nen inkawmna hun tawi a nei bawk a ni.
