Aizawl, 27th May, 2022 : Union Minister of State for Railways and Textiles Pi Darshana Zardosh chuan vawiin khan Commerce & Industries Minister Dr R. Lalthangliana chu a pisa ah tlawhin an inkawm.
Pi Darshana Zardosh chuan Dr R. Lalthangliana hnenah Mizoram chu nuam a tihzia sawiin Mizo kutchhuak puan leh hnang (handloom & handicraft) hrang hrangte chu tha a tih thu leh mawi a tih thu a sawi a, global market-a pho chhuah tlak a nih thu a sawi bakah Mizo kutchhuakte pho chhuaha hralhna tur emporium New Delhi ah awm thei se a tha dawna a hriat thu a sawi bawk. Hei bakah hian Bairabi – Sairang rel kawng pawh December, 2023 ah zawh hman an tum thu sawiin High Court ah case a la awm hian hmalak a ti muang deuh a, mahse an tum hun takah an zawh fel hman an inrin thu leh sairang railway station chu world class railway station tura duan a nih thu a sawi bawk.
Dr R. Lalthangliana chuan Pi Darshana Zardosh chu sawrkar laipui Minister Mizoram rawn tlawh tawh zingah Mizorama cham rei ber leh hmun hrang hrang tlawh hnem ber a la ni a a hriat thu sawiin heti taka Mizoram a rawn ngaihven chu a lawmawm a tih thu a sawi a, a rawn zin hian Mizoram tan rah tha tak a chhuah a beisei thu a sawi bakah tunhnaia sawrkar laipui Ministry of Textiles-a Mizoram mamawh project an thehluh chungchang sawipuiin Union Minister of State hian rang taka a lo enzui tur thu in a chhang a ni.
