Congress Thalai chuan, “Mizoram rawn tlawhtu Union Minister of State for Minority Affairs John Barla chuan, sawrkar laipuiin sum a pekte tichingpen thinah Mizoram sawrkar a puh a, Kristian ram inti ngam state-a thil thleng atan zahthlak a tih thu a sawi hi Congress Thalai Hqrs – Mizoram Pradesh Youth Congress Committee chuan zahthlak kan ti takzet a, hnam anga mualphona tawp a nih avangin Pu Zoramthanga ho hian MNF sawrkar hian Governor hnenah banna thehlut ngei se kan duh a ni,” an ti.
“Union Minister of State John Barla sawi danin Ministry of Minority Affairs atang ringawt pawhin infiamna, zirna, hostel sakna tur leh market sakna atante cheng vaibelchhe 1000 chuang Mizoram sawrkar hnenah pek a ni tawh a; mahse sum hman dan (utilisation certificate) an dilin, Mizoram sawrkarin pek tur a nei lo hi Congress Thalai chuan zahthlak kan ti em em a. Mizoram sum bawm enkawl tlakah Pu Zoramthanga kaihhruai MNF sawrkar hi kan ngai lova. Ram hmasawnna daltu leh Mizoram tithuanawptu bakah hnam dang leh Central thuneitute hmaa hnam timualphotu an ni.
Tun hnuah hetianga Union Minister te khak ngaia awm tawh lo turin Mizoram sawrkar chu kan phut a, sum leh pai enkawl thiam Congress party Pu Lalsawta kaihhruai ram mipuiin kan mamawh tawhzia a lanna niin Congress Thalai chuan kan ngai a. Sawrkar tha Mizoramin kan neih thuai theih nan Congress party ah rinna nghat turin Congress Thalai chuan mipuite kan sawm nghal a ni,” an ti bawk.
