Sawrkar Laipuia Tourism Minister G. Kishan Reddy chuan nizan khan R. Dengthuama Hall, Mualpuiah ni thum awh tur International Tourism Mart, 2022 (ITM, 2022) a hawng a. He hunah hian Chief Minister Zoramthanga, Tourism Minister Robert Romawia Royte, Chief Secretary Dr Renu Sharma, Ministry of Tourism Secretary Arvind Singh te an tel a ni.
Union Minister leh Chief Minister te hian R. Dengthuama Hall atang hian hmalakna thar pali – Chite-a Aizawl Convention Centre sakna tur, PRASHAD Project bul tanna tur bakah PM-DevINE hnuaia Bamboo Link Road pahnih – Tuirial Airfield to North Chaltlang leh Lengpui to Saiphal hnathawh bul tanna tur lungphum an phum a. Union Minister hian Mizoram Tourism Coffee Table Book a tlangzarh bawk a ni.
ITM, 2022 hawnna inkhawmah hian Union Minister for Tourism, Culture leh DoNER Minister ni bawk G. Kishan Reddy chuan Mizoram chu ram nuam leh mawi, adventure leh eco-tourism lama hmalam hun eng tak a ni, a ti a. ITM hian India hmarchhaka Tourism tihhmasawna thanlen tir a tum ber a, hemi atan hian ITM kaltlangin hmarchhak khualzin hip thei hmun chi hrang hrangte leh hmarchhak state te thil siam leh thar chhuahte pholan a; sawrkar, mimal leh pawl hrang hrang ten a hlawkna an tel theihna tur kawng zawnna atana inkawmhona leh sawihona hun tha tak siam hi a tum ber pakhat a ni, a ti bawk. G-20 a India President a nihna chuan khawvel huapah India chu dinhmun sang takah a dah dawn a, hmarchhak state a tourism investment hawnna atan pawn nasa takin a pui dawn a ni, a ti. Heng investment te hi hospitality huangah chauh ni lovin adventure, cruise, wellness leh a dang te ah pawh nasa taka tihpun anih tur thu a sawi bawk. Khawvel hmun hrang hrang atanga investment lo lut te hian hmeichhia, migrant workers leh hnam hnufual zawk te tan eizawnna a siam sak tur chu a lawmawm takzet a ni, a ti. SWADESHI DARSHAN leh PRASHAD Scheme te chu ngaihpawimawh bik an nih tur thu sawiin, Ministry of Tourism bakah DoNER leh Ministry of Road Transport & Highways te nena tanghovin hmarchhak tan hmasawnna hna thawh chhoh zel an tum thu a sawi a. Prime Minister Narendra Modi chuan kum 2019 Independence Day khan India mipuite chu ramchhunga khualzin hip thei hmunhma 15 tal 2022 ral hma a tlawh chhuak tur a mipuite a ngen thu sawiin heng kawngah hian chhungkua a naupang ten tha an thawh theihnan YUVA Tourism Club changtlung tak Mizoram college leh school-ah te din a ni chu Mizoram sawrkar chungah lawmthu a sawi a ni. National Digital Tourism Mission changtlung tak din tuma hmalak mek a nih thu sawiin North Eastern Council, Border Roads Organisation, Ministry of Defence leh Ministry of Telecommunication hnuaiah hmarchhak state te hmasawnnan chak taka hmalak mek leh hmalak zel a nih tur thu a tarlang a. Hmarchhak hmasawnnan a pawimawh sawrkar ngelnghet state hrang hrangin an nei chu lawmawm a ti a, inelna thianghlim leh thawhhona tha a thlen ngei a beisei thu a sawi bawk.
Mizoram Chief Minister Zoramthanga pawhin thusawiin Mizoram leilung mawina leh boruak thianghlimna te chu khualzin te tana tlawh chakawm leh manhla tur tak a ni, a ti a. Mizoram hmasawnna atana ruahmanna hrang hrang Central sawrkarin a pawm sak chu a lawmawm a tih thu leh state mamawh Aizawl bypass road leh Bamboo Link Road PM DevINE hnuaiah dah a nih chu thil lawmawm tak a ni a ti bawk.
Tourism Minister Robert Romawia Royte chuan Mizoramin a vawikhatnan ITM an thleng thei chu lawmawm a tih thu a sawi a, indaidanna bang vaw thiattu leh inpawh tlanna thlen thartu hun pawimawh tak a ni, a ti a. Harsatna hrang hrang te la awm mahse thawhhona tha chuan hmalam pan turin nasa takin a puih a beisei a ni.
ITM 2022 hawnna inkhawmah hian Mizoram Chief Secretary Dr Renu Sharma chuan inlawmna thu a sawi a, Ministry of Tourism Secretary Arvin Singh hnen atangin thusawi ngaihthlak a ni bawk a.Tourism Principal Secretary Manisha Saxena in lawmthu sawiin a khar a ni.
Hawnna inkhawm zawhah hian R. Dengthuama hall tualzawlah cultural program neih niin, zanriah kilho nghal a ni.
