Vawiin khan Raj Bhavan-ah John Barla, Union Minister of State Ministry of Minority Affairs Govt. of India leh Mizoram Kohhran Hruaitute Committee(MKHC) puipate an inkawm.
MKHC hruaitute chuan John Barla, Union Minister of State hnenah hian Mizorama Kuhva huan neitute harsatna a rang lama sutkian a tul thu te leh India rama Kristian ten harsatna an tawh mek chungchang leh tanpui an mamawhna te an thlen a ni.
MKHC hotute chuan Assam state-ah Mizoram chhunga Kuhva thar te kaltlangpui khap a nih dan leh a chhan te sawiin he harsatna hi a ranglama sut kian a nih theih nan hma la turin Pu John Barla hi an ngen a. India ramah Kristian ten harsatna an tawk mek tih an sawi a. FCRA hnuaia in ziaklut, kohhran leh kohhran hnuaia organisation hrang hrang ten rampawn atanga tanpuina an dawn theih tawh loh thu sawiin hei hi an kohhran leh organisation anga an hnathawhna atan mamawh a nih avangin chinfel sak an duh tih an sawi a ni. Tunhnaiah India ram state hrang hrangah Anti Conversion Law atangin Kristian te tihduhdah leh harsatna kawng tam takah an tawk chu tha lo an tih thu sawiin hei hi India ram nihna – sakhaw tan bik nei lo sawrkar (secular state) nih phung nen inmil lo an tih thu an sawi bawk.
John Barla, Union Minister of State chuan MKHC hotuten a hnena an thlen te chu a theih angin bawhzui a tum tih a sawi a. Kristiante harsatna chungchang chu Central sawrkara thuneitute Kristian pawl hrang hrang hruaitu intelkhawm ten la sawipui se tha a tih thu a sawi a. He sawihona hi a awm theih nan amah pawhin theihtawp a chhuah tur thu a sawi.
MKHC hotute hnenah Mizoram chhunga sawrkar hmalakna hrang hrangah kohhran hruaitute ten mawhphurhna pawimawh tak an nei tih a lo hriat thu a sawi a. Kohhran rawngbawlna huangah hian miretheite tanpui scheme hrang hrang te pawh inzirtir thin ni se tun ai hian mipuiin central scheme tha tak tak te hi an hrechiang zawk anga, a dawngtu pawh an tam zawk a rin thu a sawi.
MKHC hotute hi Rev Dr Vanlalnghaka Ralte, Synod Moderator in a ho a ni.
