Bunghmun: 7/4/2022: Vawiin hian Congress Legislature Party Leader leh MPCC Treasurer ni bawk Pu Zodintluanga Ralte, Thorang bialtu MLA chuan a bial chhung Bunghmunah Thianbuka Higher Secondary School Higher Secondary School, Bunghmun a hawng.
Zing lamah party inhmuhkhawmna neiin, MLA Pu Zodintluanga chuan, “He MNF party hian mipuite hmangaihna a nei lo, tuna SEDP Vaimim chi an pek hi kuthnathawktute hmuhsitna a ni. Hetiang hi chhuanmang rorel a ni ber mai. Lo in hal vek tawhah Vaimim chi bag khat tuh zawhna a awm lovang. Kar leh lawkah Bekang chi a lo thleng leh anga engtin nge in tih ang,” tiin Vaimim chi SEDP atana an sem chu kuthnathawktute tan harsatna thlentu mai a nih tur thu a sawi.
“Vaimim chi dawngtute hi lo nei miah lote pawh an awm a ni,” a ti.
MNF sorkarah mipuite khaichhuahna tur a awm loh zia sawiin, “SEDP Board-ah mi thiam rual an nei a, Chengkawl khawite an rawt a, eng chin nge kan ta ni ang tiin in buai in buai dawn. Mipuite hmangaihna leh khaichhuah tumna hi a awm lo. He sorkar hian kan sum dinhmun an tichhe vek tawha contractor leh supplier tan cheng vaibelchhe za tel a tang tawh a ni,” a ti bawk.
Congress Party chu ram tana thil thaa inpuahchah mek a nih thu Pu Zodintluanga’n a sawi a, “Hetiang sorkar siamtha leh tur hian Congress party a inpuahchaha tunah hian mi dik ‘Mr Clean’ an tih Pu Lalsawta kan zuar a, kan ram leh Finance siamtha leh turin kan nei a ni. Congress party a thawh lehna turin tunah hian tha i thawh ang u,” a ti a ni.
Party thatna tur atan insawisel mai lovin i tangho ang u, hei hi kan chakna tur a ni. Congress sorkar leh mai tur hmel hi i tilang ang u, a ti a.
“Sorkar that loh vangin mipui leh sorkar hnathawkin kan tuar vek a ni. Hetiang hi sorkar reng turin kan duh ka ring lo, public-ah pawh thudik sawi ngam party kan ni, thudikah i tang zel ang u,” tiin Pu Zodintluanga chuan a sawi.
Pu Zodintluanga hian a bial a fannaah hian Marpara South, Terabonia, New Sachan, Mauzam, Old Sachan, Sumasumi leh Tuikawite tlawhin mi thar duhawm tak tak Congress-ah a lawmlut bawk a ni.
Thianbuka HSS hi June ni 7, 2021-ah din tan a ni a. Bialtu MLA Pu Zodintluanga chuan Thianbuka HSS hawnnaah hian thu sawiin, “A hminga RMSA kha chang tam ber kan ni ve a, Middle School khaw 20-ah kan din hman a ni. Mahni post-ah zirtirtu awm lo an awm teuh mai hi, kan ‘moral value’ hi khawi atanga dik lo nge te ka ti thin. Mahni aia kal an la hi a pawi takzet a ni. Kan inenlet a ngai hle mai, hei hi kan tihthat loh chuan kan ram hian hma a sawn tak tak thei lo,” a ti a ni. Thianbuka HSS, Bunghmun hi a hawn lawm nan Pu Zodintluanga hian cheng nuai 5 a thawh a ni.
