MZP chuan, “May ni 3, 2023 atanga Manipura kan unaute leh Meiteite inkara buaina chhuak chu, a tir atanga vawiin thleng MZP chuan a ngaihven reng a, a tul angin kan che chhuak zel dawn a ni. Kan unau Vaiphei hmeichhe pahnih, Meitei ten khawvela hmaa an hmeichhe zahawmna nasa taka an tibawrhbang chu a thinurthlak kan ti hle a. Kan nulate hi ZSF leh Vaiphei khawtlang hruaitute kaihhruaina hnuaiah him taka awmin, a tul apiangah kaihhruaina pek mek zel an ni. Thil awmdan enin, Manipura Zofate tana harsatna rapthlak tak thlentirtu Meitei te leh kan unaute hi, thlamuang taka awm ho chi an ni tawh lo a, chuvangin, kan unau ten an duh ber, ‘Separate Administration’ nei tura an beihna hi thupui lian ber a ni reng a, MZP chuan a tawp thlengin kan thlawp zel dawn a ni.
“Manipur a buaina lian tak thleng mekah hian, Mizoram sorkar, Political Party hrang hrang, Kohhran hruaitute leh NGO hrang hrang leh mipui inpekna chu lawmawm kan ti hle a, hnam tana tanrual hun tak tak a nih avângin political party-te pawhin inlungrual taka tanho a pawimawhzia hre thar leh turin kan ngen a ni,” an ti a.
Manipur buaina avânga MZP hmalakna tlangpui a hnuai a mi ang hian an tarlang.
1. July ni 11, 2023 (Thawhlehni) khan Manipur kan pan a, a theih ang angin kan unaute, ram chhana ral hmatawnga duty (frontline duty) na hmun hrang hrang – Saipum, Kangvai, Loklaiphai, C. Zalenkot, Sougnu/M. Phaimol Village, G. Songgel Village, HSA Office, ZSF Information Centre leh Wall of Remembrance te kan tlawh a. Zing atanga zan thlenga hun hmang kan nih avângin, Kuki leh Hmar Inpui te duty na hmun te, ITLF office leh hmun pawimawh dang kan tlawh hman lo a, a pawi kan ti hle.
Manipura kan unaute harsatna tâwkte tan hian MZP-in Aizawlah Mobile Charity Concert te neiin sum kan tuak a, mi inphalte atangin cheng nuai thum vel kan dawng a ni. Mizoram hmun hrang hrang a\anga pawisa kan dawnte hi Manipur atanga raltlân, Aizawl veng hrang hranga awmte hnenah buhfai leh ei turte kan pe a, Manipur kan kalnaah hian, Mizorama doctor hrang hrang ten damdawi, cheng Rs 80,000 man hu leh Health Minister Dr. R. Lalthangliana’n ORS eng emaw zat min kentir bawk a, heng kan thil kente hi Manipur a ram chhan nana duty te hnenah kan hlan a, tunhnaia Meitei ten rawng taka an thah David Thiek râl nan HSA Joint Hqrs Lamka hnenah Rs 2,000 kan hlan bawk.
Lamka leh a chhehvela ram chhan nan duty kan unaute kan tlawhnaah hian, Meitei ten an beihna avânga ram chhan tura thawh chhuah reng a ngaih thu te, Volunteer eng emaw zat awm reng a ngaih avâng te, buaina avânga ei leh in thlenga mipuiin an tawrh mek dante kan han hmu a. A hmuna an dinhmun en hian an lainatawm takzet a. Manipur a kan unaute hian, Mizoram atanga tanpuina chi hrang hrang, ei leh in tur kan pek thin avânga an lawmzia te, raltlânte dawnsawn kawngah Mizoram mipui inhawnna chu ropui an tihziate min lo hrilh nasa hle a. An dinhmun hrang hrangte enin, thlabar taka awm kan unaute leh Manipuir buaina a reh theih nan tawngtaipui a, ngaihsak zui zel a pawimawh hle tih a takin kan han hmu bawk.
July ni 12, 2023 (Nilaini) zan dar 6:30-ah, ram tana nunna hlantute hriatrengna hmun (Wall of Remembrance)–ah Joint Students Body LAMKA buatsaihin ‘Solidarity Evening’ hun hman a ni a, he hunah hian ‘Candle Light Vigil’ hun hman a ni a. Ram chhan nana nunna hlantute sunna kan nei a, mi hrang hrangin thu sawiin, Pu Lalnunmawia Pautu, President MZP Gen Hqrs pawhin thu a sawi a. Thusawitu hrang hrangte hian, Zofate inpumkhat a pawimawhzia te, hnam bil tê têa inla hrang lo a, zai khata luan a pawimawhziate an sawi nasa hlawm hle a ni.
2. May ni 3, 2023 a buaina a chhuh atangin, MZP chu kan che nghal vat a. Imphal leh LAMKA a Mizo zirlai tam tak hruai chhuah a nih theih nan Mizoram Chief Minister Pu Zoramthanga hmuin, a tulna apiangah hma min lakpui a. Tum eng emaw zat kan hmu nghe nghe. Sorkar hotu hrang hrangte pawh kan nawr buai zing hle a. May ni 7, 2023 (Pathianni) khan, LAMKA a Mizo zirlaite phei chu a hmunah kan han hruai chhuak nghe nghe a ni. Heng bâkah hian, Supply Minister Pu K. Lalrinliana pawh raltlânte tan buhfai tam tak min ngaihtuahsak bawk a. Kan unau harsatna tâwkte tana sorkar hotute kan dawrnaah, chak taka hma an lâk zel avângin lawmawm kan ti hle a ni.
3. May ni 9, 2023 (Thawhlehni) khan, Mizoram Medical Representative Association chuan Manipura kan unau harsatna tâwkte tan, damdawi thahnem tak min pe a. Heng damdawite hi Hmar Inpui, Hmar ram Hqrs, Manipur hnenah kan hlan nghal a ni.
4. Zirlai pawl kan nih angin, Manipur atanga râltlan ten zirna an chhunzawm theih nan Mizoram University hotu, Nodal Officer (NEP) Prof Lalnilawma, Higher & Technical Education Minister Dr R. Lalthangliana, School Education Minister Pu Lalchhandama Ralte te kan hmu a. Zirlaite hi, vawiin thlengin zirna in hrang hrangah luhtir zel an la ni a. Mt. Carmel Principal Pu Lalnunkunga phei chuan an school a lut raltlânte hi school fee hrang hrang a awl vek a ni. Raltlânte tana zirna kawnga hmalatu zawng zawng chungah lawmthu kan sawi a ni.
5. May ni 22, 2023 (Thawhtanni) ah AMSU hian NESO kaihhruaina hnuaiah MZP chu meeting neihpui min duh angin Guwahati-ah meeting hi neih a ni a. MZP Gen Hqrs hruaitute leh All Manipur Students Union (AMSU) hruaitute chuan, North East a zirlai pawl kan nih angin, Manipur a buaina thleng mek chu a reh theih nan sawihona pawimawh tak kan nei a. Sawihonaah hian, MZP chuan Manipur a Zofate himna tura theihtawpa beih kan tum thu AMSU te hi kan hrilh a ni. Meeting-ah hian, North East a zirlai pawl dang Khasi Student Union (KSU), Naga Student Federation (NSF) leh All Assam Students Union (AASU) te pawh an tel a ni.
6. May ni 15, 2023 (Thawhtanni) khan NGO Coordination Committee chuan N Delhi-ah, Union Home Minister Amih Shah kan hmu a. MZP aiawhin Pu Jacob Lalmuanpuia General Secretary a kal a. Union Home Minister hnenah hian, Manipura harsatna chi hrang hrang sutkian a nih theih dan tur sawipui a ni a. Prime Minsiter hnenah lehkha kan thehlut bawk a ni. Hemi tum hian, All India Congress Committee hruaitu Rahul Gandhi, Union Minister Kiren Rijiju leh Meghalay Chief Minister Conrad Sangma kan hmu a, Mizoram MP (RS) Pu K. Vanlalvena pawh kan hmu bawk.
Manipura Meiteite leh kan unaute inkara buainaah hian, Manipura kan unau Hmar Inpui, Kuki Inpi, Zomi, Mizo People Convention (MPC) te leh kan unau hrang hrangte an tangrual hle a. Hnam inunauna leh inlungrualna kawngah hian, kan duh ang diak diakin thil hi awm lo mah se, he buaina avânga hmun hrang hranga Zofate rilru puthmang kan enin, a thlamuanthlak hleah kan ngai a. Tunhnaia Vaiphei nula pahnih, Meitei ten hmeichhe zahawmna zahna nei miah loa an chunga nunrawnna an lantir hi MZP chuan na kan tiin kan thin an tiur takzet a. Mahni ram chhunga harsatna lian tak thleng mek pawh rei tak ngawihsan thei Prime Minister Narendra Modi chetdan pawh mak kan tiin, tunhnaia Meiteite chet dan uchuak takin a ko chhuak ta hian, Manipur-ah boruak muanawm tak leh ‘Separate Administration’ a thlen theih nana na zâwka hma a lak kan beisei tlat dawn a ni.
Pathian ringtu kan nih angin, Manipur a buaina a reh theih nan, engkim tithei Pathianin, thiam taka ro min relsak zel theih nan, Mizoram mipui leh hmun hrang hranga Zofate leh ringtute tawngtai zel turin kan inngen nghal bawk a ni.
