National Highway tihzauna tura hma lak mekin Kolasib district-a a paltlang tur ram neitu intel khawm NH 306 Land Owners Association ten zangnadawmna an dawn tur ang an dâwn vat ngiata Mizoram luhka pui ber Vairengtea an dan chah mek chu tihtawp lailawk a ni.
Hemi chungchangah hian Sawrkar ngenna angin Central YMA chuan palai hna thawkin, Inrinni khan Central YMA hruaituten Vairengte ah kalin, Kolasib District Land Owners Association hruaitute nen kawng an danna hmun ah inbiakna an nei a, he an in biakna ah Central YMA lamten an harsatna tawhte a tul anga sawrkar lama thlen leh bawhzui an intiam bakah, Land Owners te pawhin mipuite phurrit thleng lo zawnga lungawilohna lantir tha nia hriat avangin hemi ni tlai Dár 4:30 khan kawng dan hi tih tawp a ni.
Central YMA hruaitute hi an President R. Lalngheta hovin, Treasurer Fabian Lalfakawma bakah CEC engemawzat an kal a. Kolasib Sub Hqtr YMA hruaituten an tawiawm bawk a ni.
Land Owners Association hruaitute chuan November ni 30, 2022 ralhmaa thu lawmawm an hmu lo a nih chuan an kal zel dan tur rel tha lehin, na zawka hmalak an tum tur thu an sawi tel bawk a ni.Central YMA chuan an palai hna thawh pawma, an ngenna anga Kawngpui dan an ti tawp ta chu lawmawm an tih thu leh Kolasib Land Owner Association hruaitute leh member zawng zawngte chungah lawmthu an sawi tak meuh meuh a ni.
Helai kawngpui laihzuahna tura ram laktur leh ram neitute hnena zangnadawmna chinfel ngai leh Forest Department lama thil chinfel ngai bakah, hnathawh tan maitheih a nih loh chungchang ah hian vawiin hian Chief Minister Zoramthanga hoin Revenue Minister Lalruatkima, Forest Minitser TJ Lalnuntluanga te bakah a kaihhnawih official hrang hrang te leh he hnathawh tutur NHIDCL hotute CM Conference room ah an thukhawm dawn a ni.
