Nimin khan Mizoram hmun hrang hrangah Valantines Day pualin thusen pek runpui neih a ni a. Aizawlah chuan Chanmari YMA Hall-ah AVBD leh MSACS (Model Blood Bank) huaihawtin Thisen pek runpui neih a ni a, he hun hi Health Minister Dr R.Lalthangliana chuan khuallian niin a hmanpui a ni.
Health Minister chuan mipui kalkhawm hmaah thusawiin, Valentine’s Day (inhmangaih tawnna ni) denchhena thisen hlu tak petute hi midangte tana nunna chhantu in ni a, hetianga in lo pen chhuak hi a ropui takzet a. Midangte tana in inpekna hi Pathianin a let tam takin a rul ngei ang che u, a ti a. Hnam dangte aiin Zofate hian mahni mihring puite tana inpekna kan nei nasa hi chunglam pawh a lawm ngei ang tih ka ring tlat a. Thisen hlu tak petute hi in ropui ka tiin, lawmthu ka sawi tak meuh a ni, a ti.
Dr.R.Lalthangliana chuan, Covid hun lai kha kan hria a, department leh mimal angin do hneh chi a ni lo, Mizoramah chuan pawl zawng zawng inpekna leh tanrualna kha Lalpa’n mal a sawm a. Nunna hlu tak enge maw zat chan mah i la, state dang ang em em chuan kan thi kan tam lo hlauh a, kan tanrualna kha Lalpa’n mal min sawm a. He valantines day hi hlimhlawpna mai ni lo, midangte tana inpekna ni-ah kan hmang hi ka lawm takzet zet a ni, a ti bawk.
Association for Voluntary Blood Donation (AVBD), Mizoram State AIDS Control Society (MSACS) leh blood bank-te tangho chuan Mizoram hmun hrang hrangah Valentine’s Day pual hian thisen pek rûnpui an huaihawt a, thisen unit 1,032 pek a ni.
HMUN HRANG HRANGA THISEN PEK ZAT
1. Aizawl Civil Hospital – 232 (M-166, H-66)
2. Synod Hospital – 200 (M-150, H-50)
3. ZMC – 100 (M-65, H-35
4. Lunglei – 150
5. Siaha – 94 (M-68, H-26)
6. Champhai – 93 (M-80, H-13)
7. Kolasib – 73 (M-49, H-24)
8. Serchhip – 11 (M-5, H-6)
9. Lawngtlai – 60 (M-52, H-8)
10. Mamit – 19 (M-13, H-6)
TOTAL – 1,032
