ZPM thalai chuan thuchhuah siamin, “Chalfilh constituency huam chhûnga Vanbawng khaw sub centre sak that hna kal mêkah, he sub centre sak that hna hi estimate cheng tam tak lai a ni chungin, a ruhrel leh a ban hlui hman a nih bakah, rod hlui rinawm tawh lo leh chak tha tawk tawh lo te pawh hman chhunzawm a ni a, hetianga MNF sawrkâr hnuaia duhdah taka hnathawh hi mipuite tham lohna lian takah kan ngai a, a rang thei ang bera action la turin Health Minister Dr.R. Lalthangliana kan phut a; Vanbawng Sub Centre sak thatna kal mêkah hian man tang teltu an awm ngei kan ring tlat a ni,” an ti.
Thuchhuahah chuan, “He Sub Centre hnathawh dan chungchângah hian Vanbawng khaw mipuite rilru a nat hle laia bialtu MLA Pu Lalrinliana Sailo-in a ngawihsan tlat thei hi ZPM thalai chuan mak kan ti a, Vanbawng Sub Centre sakah hian bialtu MLA hian man ?ang a lo tel ve em ni? tih hi kan zawhna a ni.He Sub Centre sak dan chhe tak chungchang hian, Pu Lalrinliana Sailo hi a bial hlui Khawzawl to Ngaizawl kawng siam chungchânga cheng nuai 100 lai mai a lo fanghma no ei tawh ni-a sawi, kumin kum tira boruak lian tak awmte pawh kha Zoram mipuite min hriat chhuah tir leh a ni.
“Mipuite’n an chan tur dik tak an chan a, mipui sum hmanga hnathawhte dik taka a kal theihna turin ZPM chuan sawrkâr hmalakna hnuaia hnathawhte ngun takin a vil tlat dawn a ni,” tiin thuchhuahah chuan an tarlang.
