Vawiin khan Saitual Bawrhsap Conference Room-ah Pu VL Hruaizela Khiangte Deputy Commissioner & District Collector ni bawk hovin Saitual District huam chhunga NH.06 leh NH.102B laih mek chungchang leh nimina kawng ko min avanga vanduaina thleng chungchangah PWD Saitual Division hotute, Police hotute, NHIDCL hnuaia hnathawh viltu General Manager/Project Manager te leh NGO hruaitute nen sawi ho a ni.
Meeting kaihruaitu Bawrhsap Pu VL Hruaizela Khiangte chuan tun hnaiah vanduaina tum hnih, kumin February 9-a Excavator operator, lung tlain a chilh boral ta leh nimin maia khualzin pakhat kawng ko lung tla avanga vanduaina tawk thihpui hial an awm chu pawi a tih thu sawiin NHIDCL hnuaia leilaih viltu Company-te chu hetiang thil a thleng leh thin chu sawrkarin a ngai thutak hle tih a hrilh.
Bawrhsap chuan hetiang thil a thlenna chhan chu a nih dan tur anga kawng laih a nih loh vang ni-a a hriat thu sawiin awihtlan (Slope) tha tak, min mai hlauhawm lova kawng laih tur a nih laiin hmun tam takah a hnuai lam atanga lung hal leh leih laih puk hmasak awm thin chuan a chung lam a tiderthawng hle a ni, a ti a. Tin, Contractor te chu Mizoram chu leilung thawlna hmun tamtakah a awm thin avangin an hmalakna tur fimkhur taka zirchiang hmasa thin turin a hrilh a, lei min duhna hmun lai phei chu engtik lai pawha a viltu indah reng turin a hrilh bawk a ni.
Sub.Hqrs’ YMA leh NGO hruaitute chuan hetianga vanduaina a lo thlen hian hnamdang leh mizo an nih sawi lovin theihtawp chhuahin hun leh tha, sum tamtak senga tanpui ngai an tanpui thin thu Company hotute hnenah hian an sawi a, chutih rualin kawngpui laih chungchangah fimkhur tura an ngen tawh thinna chu ngai pawimawh thar turin an hrilh bawk a ni.
Meeting zawh hian NH.06 laih mek Keifang leh Tuirini inkar, lei min hlauhawm leh nimin lama vanduaina thlenna hmun enchiang turin thawh chhuah zui nghal a ni a. Kawng min hlauhawm zual ni-a an hriat chu a rang thei ang ber a, furpui thlen hma ngeia siam tha turin hnathawktute chu hrilh an ni.
