Social Activist Pi Vanramchhuangi chuan, Mizoram chhunga National Highway kawngpui laihzauh leh siam hna thawk mek National Highway Infrastructure Development Corporation Limited (NHIDCL) ten kan ram leilung an tihchhiat chungchanga hmala tura Principal Chief Conservation of Forest Environment Forest & Climate Change Government of Mizoram a ngenna a thlen chu, vawiin khan PCCF hian hmala nghal tura a thuchhuah a siam tak avangin PCCF pisa kawta lungawilohna lantira an hmalak chu an titawp rih.
Social Activist Pi Vanramchhuangi chuan hmasawnna (development) hnathawh vanga kan environment tlusawp nasa lutuk tana rorelna dik (justice) phutin kar hmasa zirtawpnni khan (27/05/22 khan Principal Chief Conservation of Forest (PCCF) EF&CC govt of Mizoram hnena a thil phutte ziaka a theh luh hnuin EF&CC office kawtah Silent Strike for Environment Justice in Mizoram a nei tih a sawi a. NHIDCL in kum 3 dawn kan environment zahna chhete mah nei lo leh dimdawina tel hlek loa an nghaisak a, kan luite (seasonal leh parrenial river) 99.9% an kawng laih vunga an chhilh bo vek a, kan thing leh mau chhiar sen loh an tihchhia a, chung hmuna cheng nungcha an chimit zo vek an hmu ve reng ati a. Engati nge an tih tawp loh? Engati nge kan environment an humhim loh tih chu an zawhna anih thu sawiin, Mizoram Pollution Control Board ten complain an dawn avangin kum 2021 ah khan NHIDCL vawi hnih lehkha an pe a, DC te an pe bawk. Chhanna an dawnglo. Tin, tun thla mai khan kan lui tui te an luan nut vek hnuah an pe leh bawk a ni.
Hengte avang hian NHIDCL hian kan ram leilung an tihchhiat te hian tungnunng tha leh emaw siamtha leh ngei tura hmala tura an phut thu sawiin, heihi Forest Dept PCCF lam pawhin hma anla tha em tih chu an enzui zel dawn tih a sawi bawk a ni. Pi Vanramchhuangi chuan heng leilung an tihchhiat te hi keini chuan kan hmu a, kan bihchiang a, kan au chhuak a, kan ziak a. Ka au awnawn pawhiin bengkhawn a hlawh loh vangin kan environment tan kan nih nih kan nih a lo ngai ta a ni ati. Vawiina NHIDCL te hnathawh avanga lungawilohna lantir anih chungchang PCCF in thuchhuah a tarlan danin, heng an hmalakna avang hian Mizoram Forest Act 1935 leh forest Conservation Act 1980 a bawhchhiat avangin hma anlak tur thu hi hriattirna a tichhuak ta a, he lehkha copy hi Pi Vanramchhuangi Social Activist pawh pek niin, NHIDCL te hnathawh avanga hmala tura PCCF an phutna pawh an titawp ta rih ta a ni.
