Vawiina Budget Session neih chhunzawmah, VL Zaithanzama, MLA zawhna, “Aizawl khawpuia cheng ten nitin hnianghnara tui hmu turin tui engzat nge an mamawh?” tih leh “Tun dinhmunah nitin tui litre engzat nge pump a nih?” tih chu PHE Minister Prof. Lalnilawma chuan chhangin, Tunah hian Aizawl khawpuiah mihring 3,78,500 vel awm ang a ni a, tui hnianghnar taka dawng tur chuan Central Public Health and Environmental Engineering Organisation (CPHEEO) Guidelines @135 Litre Per Capita Per Day (LPCD) angin tui 66.42 MLD (Million Litre Per Day) mamawh a ni a. Tunah hian tui 28.77 MLD (Million Litre Per Day) nitin pump chhuah țhin a ni,” a ti.
Opposition member Ngunlianchunga zawhna, “Mizoram a khua sorkarin tui a pek zawng zawngte chawmtu lui tui leh tuikhur tui, kumtina a tam lam dinhmun emaw a tlem tial tial dan hi sorkarin a chhinchhiah thin em? ; A chhinchhiah chuan chutiang record-te chu mipuite hmuhtheih turin Department website-ah dah a ni thin em? ” tih leh “A chhinchhiah loh chuan kumin atangin a chinchhiah thei ang em? Tin, chutiang record-te chu mipuite hmuhtheih turin Department website-ah a dah theih ang em?” tih pawh chhangin PHE Minister chuan, “Mizorama khua, sorkarin tui a pek chawmtu lui lian leh pawimawh thenkhat chu kumtina a tlem tial tial dan chhinchhiah a ni a, chutih laiin tuikhur tui te erawh chu chhinchhiah a ni hran lo.
“Tun thleng chuan Mizorama khaw chawmtu lui tui tlem tial tial dan record hi mipuite hmuh theih turin Department website-ah tar chhuah a ni rih lo.
“Lui tui leh tuikhur tuite a tam leh tlem dan dinhmun hi, Department chhinchhiah tawh bak pawh a theih ang ang chu kumin atangin chhinchhiah belh tum a ni ang. Tin, chutiang record te chu mipuite hmuh theih turin
website-ah dah tum a ni bawk ang,” a ti.
Vawiin Session-ah hian Opposition member Lalrintluanga Sailo resolution, “Mizoram Subordinate Service Selection Board (MSSSB), Mizo Thalai hnazawng mekte tana rintlak leh tangkai tak thiah tak hi sorkar in ennawn leh rawh se.” tih chu pawmpui a ni lo bawk.
