Vawk suat zangnadawmna mi 2488 hnenah pe chhuak

Aizawl July 26 : Kum 2021 chhunga vawk pul hri “African Swine Fever” leng darh zel tur venna tura AH&Vety Department-in vawk an suat sakte tana zangnadawmna, AH&Vety Minister Dr K. Beichhuan vawiin khan a sem a. Vawk suat tak neitu chhungkaw 2488 hnenah zangnadawmna sum fai Rs 10,48,42,200/- an bank account theuhah Direct Benefit Transfer-in thun a ni ang.
Vawiina Vety Polyclinic Hospital Conference Hall, Khatla hun hman ah Dr K.Beichhua chuan African Swine Fever (ASF) dona kawnga hmalakna leh zangnadawmna (compensation) hmuh a nih theihna tura hma lakna a theitawp chhuahtute chungah lawmthu a sawi a, nikum 2021, March ni 21-a Lungsen khuaa vawk thih dan rinhlelhawm report an dawn veleh rang takin an bawhzui nghal tih sawiin amah ngei pawh March ni 8, 2021 khan Vety daktawr leh mithiamte nen Lungsen khua panin a riahchilh tih a sawi a, ASF darh zel tur khuahkhirh turin hma an la nghal a, an rin aiin a lo darh zau hman hle tih sawiin ASF hri kai hi 100% an thi tia sawi pawh a lo dik hle tih an tawnhriat thu a sawi bawk a ni.
Minister chuan ASF vanga vawk thi zawng zawngte zangnadawmna pek kan duh laiin sawrkar laipuiin inkaihruaina a lo neih sa ang baka kal a theih si loh avangin AH&Vety department hriatpuina a vawk suatte chauh zangnadawmna kan pe thei a ni, a ti a. Hemi atana sawrkar laipui leh state sawrkar sum thawh tur hi 50-50 a nih vangin mipuite manganna hriatpuia state sawrkarin a do letna tur sum petu Chief Minister Zoramthanga chungah lawmthu a sawi bawk a, ASF hri kai vawk thite zangnadawmna tur pawh planning department kaltlangin an bawhzui tih a sawi a, Chief Minister Zoramthanga’n Prime Minister Narendra Modi hnenah PM’s Special Package anga pe turin lehkha a thawn thu a sawi bawk.
National Action Plan hnuaia ASF nuaibo (eradicate) na atana hmalakna lian tak dang chu CULLING (vawk suat) hi a ni a. Infected area chhunga mi zawng chu hri la kai lo pawh suat vek tur a ni. Mizoramah pawh hei hi a theih ang chin chinah kal pui a ni a. Vawk neitu te remtihna la hmasa vekin CULLING hi kalpui a ni. Culling atan hian hetiang hian Government of India chuan compensation pek theih dan ruahmanna a siam nghe nghe a ni.
Vawk kg 15 hnuai lam tan Rs. 2200, kg 15-40 tan Rs. 5800, kg 40-70 tan Rs. 8400, kg 70-100 tan Rs. 12000, kg 100 chunglam tan Rs. 15000 a ni a. Vawk chaw an lo dahkhawl pawh tihchhiat vek tur a nih avangin vawk chaw kg 1 zelah Rs. 22 ruahman a ni bawk.