Vawiin khan MPCC chuan thuchhuah siamin, “Ni 6 September, 2022 (Thawhlehni)-a VC leh LC inthlanna hmun 30-a Seat 50 inchuhnaah Congress Party-in Seat 16 zet lain Congress party thlawp Independent Candidate pakhat thlantlin a ni bawk a. Ruling party leh party dangten thlemna leh tawktarh chitin reng an hmatheh karah Congress party-in seat 16 zet kan la thei hi result tha takah kan ngai a, tun hnaia Congress party-in ram puma hma a sawn nasat zia tichiangtuah kan ngai a ni. Tin, Aizawl khawpui chhung LC By-Election neihna a Ruling Party MNF chak zo lo hian Congress Party Pu Lalsawta kaihhruai mipuiin an rin tawk zia a ti lang chiang hlêah kan ngai a ni.
“Tun tum inthlanah hian BJP-in seat 5, Congress in seat 16, MNF-in seat 23 leh ZPM in seat 5 an la a, party hrang hrang aiawha thlantlinte Congress party chuan duhsakna kan hlan a, ram leh hnam, khawtlang tana nghet taka ding turin kan ngen a ni. Tin, mualpho pawh huama Congress Party tana dingchhuak zawng zawngte kan chhuang takzet a, tlingte kan lawmpui rualin, tling zo ta lote pawh kan tawrhpui takzet a ni.
“Inthlanna thianghlim leh felfai tak neih a nih theihna atana thawktu Official-te leh Congress party aiawha ding kan Candidate-te duhsak taka min Vote a min puitu Mizoram mipuite chungah Congress Party chuan lawmthu a sawi takzet a ni,” tiin an tarlang a ni.
