Vigilance Awareness Week 2022 Hawnnan Walkathon buatsaih

Tukin zing dár 7:00 khan Mizoram Sawrkara Vigilance Deptt. te leh Central YMA thawk dun chuan Vigilance Awareness Week 2022 hawnnan leh eirukna leh hlemhletna duh lohna kawnga hmalaknan kêa kal an buatsaih.
A hu hova kêa kal (Walkathon) an buatsaih ah hian Aizawl khawpui chhunga Branch YMA tin atangin mi 3 zel an kal khawm a. Sikulpuikawn atanga Branch YMA 40 aiawh kalkhawmte chu Lalsanglura, SP ACB in a vai liam a. Chanmari kawn atanga Branch YMA 68 aiawhte chu Laldingluaia, Directorin a vailiam thung a, hmun hnih atang hian Vanapa Hall kawt pan khawm a ni a. Vanapa Hall kawtah hian hun hman chhunzawm a ni.
Vanapa Hall kawt a hun hman chu Lalhmachhuana, Vice President Central YMA in a kaihruai a. R. Lalngheta, President Central YMA chuan thu sawiin, ram leh hnam hmelma corruption hi mimala do hneh theih chi a ni loa, ram mipuiten tangruala do chi a ni a ti a. Kan State Sawrkar hian Central atanga kan sum dâwn te hi diktak leh fel takin a hmanna tur dik takah hman ni rawh se tih hi mipuiten kan duh a ni a ti bawk.
R. Lalngheta chuan Mizoram Police-te chu India Ram Police-te zingah Conviction nei sang ber an nih thu leh ACB in corruption case an chhui atangin kum 2022 chhungin case 3-ah conviction an dâwn tawh thu kan lo hria a, a lawmawm hle. Chutih rualin CBI ten Mizorama an hnu chhuiah conviction an neih thawm kan la hre ve chiah lo erawh chu tan min lak zual sak se tiin kan chah a ni a ti bawk. Central Sawrkar thu angin corruption do turin Lokayukta kan din hi a lawmawm em em a, hnathawk tak tak thei turin Sawrkar hian thuam chakin member tha tak tak ruat thuai se a tih thu a sawi bawk.
He hun hi Mizoram State Chief Vigilance Officer leh Mizoram State Chief Secretary ni bawk Renu Sharma chuan thusawi in a hmanpui a, Lalhriatpuia, Addl. Secretary, Vigilance Deptt. in kalkhawmte thutiam (Pledge) a sawi rual tir a. Lal Muanpuii, Under Secretary Vigilance Deptt chuan lawmthu sawina hun a hmang bawk a ni.