Dated Lunglei: the 28th November 2024 (Ningani) :- Pu Lalduhoma Chief Minister Lawngtlai tlawh tura kal chuan vawiin chawhma dar 11:30 Am khan ZPM Southern Hqrs Office, Lunglei tlawhin, Sorkarin kalphung tha nei turin kawng tam takah hma ala chho mek tih a sawi a, kalphung tha lo tam tak te vawilehkhat a siam that zung zung theihloh te pawh a awm a, mahse tunah hian Sorkar angin chak takin hma lak chhoh zel a nih thu a sawi.
Chief Minister chuan Village Council inthlan chungchang sawiin kum thar 2025 February thla chawhnu lamah chuan inthlanna neih tura ruahman mek a nih thu sawiin, he ruahmanna an kalpui chhan chu Village Council term kal mek hi Covid avang khan pawhsei a ni tawh a, a tul hunah Sorkar chuan a pawt sei theiin a pawt tawi thei, hei hi Sorkar thuneihna a ni a, tunhma pawhin pawh sei leh pawh tawite alo awm tawh thin a, thuneitute thu neihna a ni a ti a, tunah Court-ah kan khing dawn tih thawm te kan hria a, an buai peih chuan min khing se, keini tan buaina tur a awm hran lo a ti.
February thla ah Session kan nei ta ziah a, Planning Commission kan neih tak loh hnu hian Session hi kan nei hma ta a, Parliament pawhin Session hi an nei hma tlangpui ta a, chuvang chuan a tlai berah February thla tawp lama Session hi kan tan loh chuan kan tlai ang tih kan hlauva, chungte ngaihtuah chuan Budget Session hma a lo inthlan fel kha a pawimawh ani a ti bawk.
Village Council kan han inthlang ang a, Financial Year thar April thla atangin hna an thawk thei tawh dawn Chief Minister chuan tiin, chutianga hunbi pawimawh bik anih avang chuan Financial Year thar kha a hlui ten an kai khan thil buaithlak a awm theih thin avangin hetiang ruahmanna hi siam a ni a, Village Council thar-ah chuan kalphung thara kal turin kan duh dawn ani a ti bawk. Chief Minister Pu Lalduhoma chuan Hand-Holding chungchang ah Loan lak chi leh Chief Minister’s Special Pakage (a thlawn a cheng nuaikhat thleng lak theihna) a awm tih sawiin, November thla thleng dilna hun hawn a nih thu leh heng diltute hian tunah hian an hmuhloh pawhin an dilna hi an ring zel thei dawn a ti a, tun December thla chhung hian CM’s Special Package bik hi Selection neih tum a ni a, tun financial Year chhung ami tur hi chu a Pilot Project anga kalpui a nih thu leh nakum leh a kum leh ah tam leh zuala kalpui chhoh zel tum a ni a ti a, tuna Pilot Project atana thlan tur te hi mite entawn tlak leh rintlak te an ni ang a ti a, sum dinhmun nena in mil turin kalpui ani anga, Department hrang hrangin an thlan theih tur zat pawh siam fel tawh anih thu leh Department tina lut te chu an endik tur ani tih a sawi.
Chief Minister chuan Hand-Holding chihnih kalpui turah hian Project/Trade nei thalo endik dawllo chu ZPM Party hotu pawimawh tak pawh nise hetiang mi hi thlan tur an nilova, mi hlawhtlinglo tur chu tupawh nise thlan tur an nilo a ti a, hetianga kan kal loh chuan Sorkar kal hmasa te nen kan danglamna a awm dawn lo tiin, ram siam that tuma hmala kan ni a, siam tha turin Pathianin Sorkarna min pe a, siamthat hna kan thawhleh siloh chuan awmzia a nei dawn lova, chuvangin mi hlawhtling tur kan lawr dawn tiin, Unit list leh Block list tih vel hi kan Sorkarah a awm thiang velo a ti. Department tin ten an hnena dilna lut te an endikna ah a that ha thlan theih chin chu an kutah a awm dawn a, tin a endik hna hi a hautak hle dawn a, hmu tlaklo thlan anlo nih pawhin a thlangtu hi kan mawhpuh dawn a, chuvang chuan kan Officerte pawh an fimkhur em em ani a ti a, heng thlan te hi January thla ah hian training pek tumin ruahman ani a ti bawk.
Chief Minister chuan Sawhthing, Aieng, Hmarcha leh Hmunphiah lei turin Expression of Interest (EOI) Advertisement tihchhuah tawh anih thu sawiin, tun thla November 22.2024 kha a thehluh hun hnuhnung ber a ni a, heng lei duh tur hote nen inremna siampui tum mek a ni a ti a, Sawhthing lei duh Em-pannel Farm kan nei anga, chutiangin a dangte pawh hi kan nei ang tiin, kan hriatpuia Sorkar nena inremna kan ziahpuite hi chu Sorkar hmun hma Godown te hman phalsak an ni dawn a, inremna kan ziahpuite hnena hralh te hnenah support prize kan pe ang a ti a, hetihlai hian lei ve duh dang kan rate ang Rs.50/- chin chung lama anlo lei ve duh a nih chuan a tam thei ang ber lo dawr ula kan duh a, hengte hi support prize pek an ngai ve lova, tin khawi khua emaw a an duh ang rate a an lo hralh pawhin an duh dan chu tha an tihpui tih sawiin, support prize erawh pek ve an ni lovang tih a sawi bawk.
Chief Minister chuan he hmalakna turah hian hlawhchham an tum lo tih sawiin, kan thar tur zat pawh hi a tlangpui thu chhutchhuah a ni tih sawiin, Reliance Company hotute nen pawh tunhnaiah indawrna neih a nih thu leh an ni hi an tlai deuh tawh thu Chief Minister chuan sawiin, an ni hian Sawhthing pawh Kg ah Rs.80/- in kan la tih an sawi a, mahse an rawn lang har a, an ni hian Sapthei thlengin an lei duh dawn a, chuvangin Sapthei hi uar thar leh tum a ni tih sawiin, anni hi nakum lamah chuan rinpui bera neih tum anih dawn thu a sawi.
