Vohbik naupangte luhna – Shining Star Special School, Republic Veng tan Aizawl South-I bialtu MLA C Lalsawivunga chuan zirlaite lam leh thlahna atana hman turin lirthei, eco van a pe.
Vawiina lirthei inhlanna inkhawmah MLA C Lalsawivunga chuan vohbikte bula awm chu a thlamuanthlakin nun a zalen thin, tia sawiin, Shining Star Special School kaltlang hian heng zirlai naupangte hian Pathian malsawmna an chan ngei a beisei tlat tih a sawi. He rawngbawlna hi Lal Isua duhzawng rawngbawlna a ni, tiin, he hmuna thawktu zawng zawngte chu khawngaih rawngbawl hna thawh tur Lal Isuan an koa a nghat leh buatsaih sak chu a ropuiin fakawm a tih thu a sawi bawk.
Aizawl khawpui, a bikin Aizawl chhim lama vohbik naupang, thluak leh taksa lam khawih rualban lohna neite tana school din Shining Star Special School hi kum 4 kaltaa Aizawl Republic Venga bul tan a ni a, zirlai pahnih chauha bul tan kha tunah hian zirlai 22 an nei tawh a. Zirlai nu leh pa leh mi thahnemngaite te din Society for Rehabilitation of Persons with Disabilities chuan a enkawl a ni. Zirlaite hi veng hrang hrang amite an nih avangin anmahni leh a hruaitu an chhungte tan school-a thlah leh lamah harsatna a awm thin a, bialtu MLA hnena an dil angin a ni hian a MLA fund atangin cheng nuai 5 chuang sengin Eco Van hi a ngaihtuah sak a. He Society patron Lal M Dingliana, IFS (Rtd) kutah MLA hian a document leh chabi a hlan a ni.
