Vawiin September 8, 2022 hian Aizawl District Congress Committee (ADCC) huaihawtin Lal Thanhawla Auditorium-ah Block leh Unit hruaitu rualte tan Aizawl City Block Joint Conference neih a ni a. He hun hi Pu PC Lalhuapzauva, Vice President, ADCC-in kaihruaiin ADCC President Pu Vanlalzuiliana’n inlawmna thu a sawi a, Congress Party Office Bearer pathumten thu an sawi bawk.
He hunah hian Pu Lalsawta, President, MPCC chuan thu sawiin, “Kan duhthusam pha chiah lo mah ila, LC leh VC Bye Election Results a tha thawkhat a, Congress Party insiamtha mek hi mipuiin min thlir a, min ring chho tan niin kan hria a, kan lawm em em a ni. Hlawhtlingte kan lawmpui a, hlawhtling ta lote pawh beiseina thar nena tang leh zual turin kan fuih a ni,” a ti. “Pathianin mihring min siam chhan hi Lal Isua lalna ram (Kingdom) din tura min duh vang a ni. Ram hmasawnna kan ngaihtuah hian he thil pahnih hi kan ngai pawimawh ang (i) Environment humhalh chunga Development thawh leh (ii) Mihring chhungril Nun tha (Morality) humhalh te hi. Mihring rilru thatna awm hi thang lian turin Sorkar tha chuan an chawm nung thin,” a ti bawk.
Pu Lalsawta chuan vote lei chingte laka inthiarfihlim tura kalkhawmte fuihin, “Nakum Inthlan thlirin i chhiah pek tlingkhawm, dik lo taka an lo chheprelh hmang khan NANGMAH lei tuma thlemna i tawk dawn. I VOTE lei tumtu hian lei theih THIL ang lekah a ngai zawk che a nih hi! Nangmah a hmangaih vang che ni lovin amah a inhmangaih a, a lo hausak belh theih nan sum a hmang a ni. Lei tumtute an lokal hunah chuan – LO TIZAK RAWH! LO TIBEIDAWNG RAWH U,” a ti.
Congress-in sorkarna a siam huna a tih turte sawiin, “Kan ram siam tur hian thil tam tak tih tur kan nei, kan sawi seng lovang. Kan sorkar a nih chuan ram rorelna dik leh rin tlak nei tur te, chhungkaw harsa zawk, mahni a dingchhuak zo lote tanpui nana tang puihna turte, mamawh intawm siam te, mimal harsatna sutkianna turte kan kalpui dawn. Tan la thei lo harsa lehzualte pawh Congress-in kan hlamchhiah dawn lo, an pualin ruahmanna kan siam dawn. Mizoram hi taima leh thawkrimte dinchhuahna ramah kan siam dawn a ni,” a ti.
Pu Lalsawta chuan Congress Party hruaitute chu Pathian duh dana nung tura chahin, “Pathian laka kan tlin lohzia leh ngaihdam ngai reng kan nih hi inhre reng ila, engmah chhuan tur nei lo kan nih angin Congress mipui hian kan sualte kan sim a, Pathian lam kan hawi a, Pathian kan auh chuan Ani chuan min lo ngaidam ang a, min tidam leh ang. Kan tum ber hi Pathian duh dan a nih phawt chuan Pathianin min tanpui ngei beisei ila. Pathian tanpui tlak nih i tum ang u,” a ti bawk.
Pu Lal Thanzara, Vice President, MPCC pawhin thu sawiin, “Congress Party hi Mizoram a mi rethei zawkte tan malsawmna a lo ni tawh thin. Rangva inchung nei pha lo chhungkaw 30,000 chuang Rangva a lo pe tawh a, NLUP hmangin chhungkaw tam takin vawiin thlengin eizawnna an neih phah bawk. MNF in Independent an sual a, Mizo leh Mizo te hial kan inthat buai buai a, tah leh ha thialna ramah kan awm a. Congress Party-in kan intiamna angin remna leh muanna kan thlen a, a lawmawm zia hi ram buai hre pha lote chuan an hrethiam pha lo maithei. Congress sorkar hnuaiah sorkar hnathawkte an zalen a, hlawh an hmu tha a, a ralmuang em em thin. Congress Party hi a chhe lai siamthatu a ni zel a ni. Mizoram a hmasawnna tluantling thlentu chu Congress Party a ni zel a ni,” a ti.
He hunah hian hetiang hian Resolution siam a ni :
1. Mizoram sorkar sum enkawl thiam Ioh avanga sorkar sum harsa em em te, a hun taka sorkar hnathawk ten hlawh an Ia theilote hi kan dem tak zet a ni.
2. Sorkar kalphung mumal loh avanga kum tam tak khawthlang lam, Hachhek tlangdung mipuiten eizawnna atana an lo hman Kuhva hralhna kawnga harsatna an tawk hi kan tawrhpui tak zet a. Sorkar hi mipui tana ding ngam tur leh dan ang taka kut hnathawktute thlai thar hralh a nih theih nan rang taka hma la turin kan phut a ni.
3. Sorkar pawisak lohna leh dan bawhchhiatna tam lutuk hi pawi kan ti tak zet a. Sorkar rorelna-ah mipui zinga duhsak bik leh hleih neih bik lutuk anga lang awm thin hi pawi kan ti hle bawk.
4. Dik taka sum enkawl a, sorkar tha leh mumal tak din turin MPCC Prcsident Pu Lalsawta hi kan ring tawk a. A hnung zuia a tha tichak turin theihtawp kan chhuah dawn a ni.
5. MPCC President Pu Lalsawta’n a lo sawi tawh angin ‘That Loh Theih Lohna Bawm’ kalphung anga sorkar tha leh dik siam turin Congress Party-a lo awm tawh thin, engemaw avang a min chhuahsan ta zawng zawngte Congress Party-a Iokir leh vek turin kan sawm a ni.
