Tourism Department kaltlanga buatsaih Winter Festival 2023 cum Mega Exhibition, December ni 11-16, 2023 chhunga neih kharna hun chu vawiin chawhnu dar 2:00 khan Lammualah neih niin, he hun hi Art & Culture Minister Pu C. Lalsawivunga chuan khuallian niin a hmanpui a ni.
Khuallian Art & Culture Minister Pu C. Lalsawivunga chuan hlawhtling taka Winter Festival 2023 cum Mega Exhibition buatsaih a nih theih nana thathawhtute leh a hlawhtlinna kawnga pawimawh a chhimtute fakawm a tih thu a sawi a. Ram mawi leh sik leh sa nuam tak Pathianin min pek hi a nihna ang taka chhawr tangkai turin Tourism chawisan hi hmalakna pawimawh tak a ni, a ti a. Factory leh industry lian nei lo mah ila, khualzinte hipna tur siam chawp ngai lova ram mawi leh nuam kan neih sa hi kan chhawr tangkai thiam a ngai a ni, a ti bawk. Sawrkar laipui leh Mizoram Sawrkarin Tourism chawisan a ngaih pawimawh thu tarlangin, project lian tak Swadesh Darshan 2.0 Aizawl leh Champhai District-ah kalpui mek a ni a, heng bakah hian Sawrkar hmasa hmalakna pawimawh tak takte pawh theihtawp chhuaha chhunzawm zel tum a ni, a ti bawk.
Art & Culture Minister chuan mipuiin eizawn nana tourism industry an hman tangkai dante tarlangin, hei hian sum lakluhna tha a siam sak a ni, a ti a. Thalaite chu tourism industry hmanga eizawnna siam tuma ngaihtuahna seng turin a chah a. Festival chu sumdawngte tana an thil dehchhuah hralhna, zai leh lam mite tana inphochhuahna, Mizo thu leh hla vawnhim mai bakah mipuite tana intihhlimna tha tak a nih thu a sawi a. Khualzin hip leh Mizo culture vawnhim kawngah Art & Culture Department leh Tourism Department-ten theihtawp chhuaha hma an lak zel dawn thu sawiin, hemi atan hian mipuite thlawpna leh tawiawmna a ngen nghal bawk.
Winter Festival 2023 cum Mega Exhibition kharna hun hi Tourism Secretary Dr. Lalrozama, IAS chuan kaihruaiin kalkhawmte lawmna thu a sawi a. Pi Zonunthari, Deputy Secretary, Tourism Department-in report a pe a. Pi Lalthakimi Pachuau, Jt. Director, Tourism Department-in lawmthu sawiin hun hman a khar a. Hemi hnu hian Winter Festival variety program neih chhunzawm niin, zan lamah Winter Festival Concert buatsaih a ni ang.
Winter Festival 2023 ah hian Tour package siam niin hemi kaltlang hian mahnia zin senso aia tlem daiha zin theihna chhawpchhuah a ni a. Yuva Tourism Club, Band leh zaithiam tak takte tan hun remchang siam a ni a. Mipuite’n an thil siamchhuah an zawrhna turin Exhibition Stall 71 leh Food Stall 29 siam a ni a. Tourism Department tarlan danin nitin exibition stall atangin cheng nuai 9 leh food stall atangin cheng nuai 10 bawr vel lei anga chhut niin, local entrepreneur leh ei siamte hian festival chhung hian cheng vaibelchhe khat vel la lut thei tura chhut a ni a. Stall luahman leh a dangte atangin Department-in revenue cheng nuai 10 bawr vel a hmu thei tura chhut a ni bawk a. Winter Festival 2023 cum Mega Exhibition hian chhimtu mi nuai khat bawr vel a nei ni a chhut a ni.
