Aizawl 21st September, 2022 : Vawiin September ni 21, 2022 hi khawvel puma Alzheimer’s vei te ni ‘World Alzheimer’s Day’ a ni a. He ni pual hian Alzheimer’s & Realted Disorders Society of India (ARDSI) Mizoram Chapter pawhin tukin zingkarah khan hun hmangin, Chanmari atanga Millennium Centre thleng ‘Memory Walk’ neiin kawng zawh a ni a. He hun hi Dr. K. Beichhua, Hon’ble Minister of State, Social Welfare Department, Govt. of Mizoram chuan khuallian niin a hmanpui a ni.
Khuallian Dr. K. Beichhua chuan, “Vawiina kan kawng zawh chhan Alzheimers hi thluaknatna chikhat a ni. Mihring kan nih chhung hian thiltha tam tak Pathian atangin kan hmu a, thil tha lo te pawh hi tam tak a thleng ve dawn a ni. Chuvangin vawiinah pawh hian he natna hi midangte chung chauha thleng turah ngai lo ila, keimahni chungah a thleng thei a ni tih hria ila. Alzheimers lan dan tlangpui chu haihawt te, nunphung inthlak thut thut te a ni a. Kan nu leh pa te hunah kha chuan an lo hrethiam lova khawhring manah te ramhuai thiltihah te an ngai thin a ni. Vawiinah chuan damdawi lam hmanruate a changkang tawh a, natna te pawh kan hrechhuak zung zung thei ta a. He natna hi enkawl theih a ni a, amaherawhchu vanduaithlak takin tihdamna a la awm lo a ni,” a ti.
Dr. K. Beichhua chuan, “Alzheimers veite puala ‘memory walk’ kan neih hian Mizoram mipuite thu ropui tak kan chah a ni tih hria ila, vawinah hian tihdamna awm lo alzheimers veite hi a enkawltu kan nih a ngai a, alzheimers natna chungchanga mite hnena awareness petu ni zel turin kan inchah a ni,” a ti bawk.
Pu Vanneihtluanga, President, ARDSI Mizoram Chapter chuan, “He natna hi kan hrechiang a, a rapthlak dan te, a beidawnthlak dan te, chutihrual chuan Pathian malsawmna a nihzia te kan hrechiang em em a ni. Vawiinah hian he hun kan hmang thei hi a lawmawm em em a, a chang chuan a tuartute ngei wheelchair a rawn nawr changte kan nei thin. Vawiin a he hmuna lokal ve thei lo te kan hre hreng che u a, hah tak leh rim taka dawhtheihna leh hmangaihna nen in chhungte in lo enkawl thin avangin lawmthu kan sawi a ni,” a ti.
He hun hi Pi Malsawmthangi, ECM, ARDSI Mizoram Chapter chuan kaihruaiin, Rev. F. Lalhmingthanga PCI, Dawrpui bialtu chuan hunserh a hmang a, Dr Daniel Chianghnuna, Jt. Secretary ARDSI Mizoram Chapter chuan inlawmna thu sawiin, Dr. HK Laldinpuii, General Secretary, ARDSI Mizoram Chapter hnen atangin report ngaihthlak a ni bawk a ni.
